Ayera den Parlamento di Aruba a tuma luga e tratamento di e ley di BBO na frontera. Un ley cu inicialmente tabatin un fecha di introduccion di 1 di juli, pero mirando tur e puntonan cu a ser treci pa dilanti pa e gremionan comercial, Gobierno di Aruba a extende su fecha pa dia 1 di september.

Desde e anuncio di e introduccion di un BBO na frontera, diferente organisacion di gremio comercial a trece pa dilanti nan pregunta- y puntonan. Algun comerciante a expresa nan malcontento y otro nan confusion y tabata pidi na mas di un ocasion, aclaracion ariba kico e cambio di e ley aki ta encera.

Durante e tratamento di e ley den Parlamento Minister di Finanzas y Cultura, Xiomara Maduro, a splica na Parlamento di Aruba cu gobierno a reuni cu e organisacionnan comercial cu tabatin pregunta y preocupacion pa loke ta e introduccion di BBO na frontera.

El a indica cu durante full luna di juni expertonan riba e tereno fiscal di Departamento di Impuesto (DIMP) y tambe Departamento di Aduana a tene varios sesion cu caracter practico y informativo pa miembronan di diferente gremio y sector priva.

E enfoke di esaki, el a splica, tabata pa brinda informacion tocante con e concepto di ley di BBO na frontera ta y tambe e participantenan a haya un bista riba e sistema automatisa cu ta wordo usa na Departamento di Impuesto y tambe den Departamento di Aduana pa asina nan por mira e testnan cu ya caba ta tumando luga.

Pa loke ta puntonan cu a bin pa dilanti di parti di e gremio comercial, dos punto importante ta e definicion di productonan comercial “handelsgoederen” y e proceso di restitucion di impuesto.

Minister Maduro a indica cu pa loke ta e definicion di “handelsgoederen” a splica e gremio comercial y sector priva tocante e interpretacion di e palabra “handelsgoederen”. El a splica cu “handelsgoederen” ta encera tur producto cu ta wordo importa cu e meta pa wordo rebendi. El a agrega cu esaki nan ta hacie pa mantene e simplesa den e ehecucion di e ley di BBO na frontera y e derecho di deduccion.

Pa loke ta deduccion, Minister Maduro a remarca cu e BBO cu ta wordo paga na frontera di tur producto cu ta wordo rebendi ta 100% deducibel di e volumen di benta di e comerciante.

Den nos siguiente edicion lo elabora mas ariba e tratamento den Parlamento di Aruba di e ley di BBO na frontera.