Secretario di estado Hulandes pa Asunto di Reino, Raymond Knops, no a duna solamente un relato extenso na Tweede Kamer ayera, pero a ilustra claramente cu entre gobierno di Aruba y esun di Hulanda tin un colaboracion bon andando. Sin bay den evaluacion ni valoracion politico di esaki, mester constata cu ta esey gran parti di e pueblo kier mira. Despues di e acuerdo firma na november aña pasa, a sigui varios luna unda pa esnan no envolvi intimamente cu e colaboracion aki no tabatin un claridad ainda con esaki lo ta bay, si tin hopi friccion, desacuerdo, etc. Lesando e relato di e secretario na parlamento Hulandes encuanto e diferente temanan trata eyden, no por saca otro conclusion cu riba mayoria di tema Aruba a entrega e trabao palabra, y den algun caso pa motibo obvio, tabatin algun retraso cu a keda programa di biaha pa e segundo ‘uitvoeringsagenda’ cu lo sigui despues di caba di atende e promer aki.

Esaki pa varios motibo ta bon noticia. Uno ta cu di e manera aki e fondonan cu Aruba tin mester urgentemente, ta keda bin di e unico fuente cu nos tin actualmente. Pero esey no ta tur. For di tono y contenido di e relato di Knops ta sali un señal cu ta posible pa traha conhuntamente, cu diligencia y seriedad, na momentonan dificil, y yega na acuerdo sensato. Claro cu e momentonan dificil lo yega sin duda algun mas leu den e proceso, ora mester tuma e decisionnan mas dificil, cu ta regarda por ehemplo e medidanan encuanto tamaño y remuneracion di e aparato publico. E relato di Knops a referi solamente na e ley di reduccion di salario halto den e entidadnan (semi)estatal, pa cual e norma ‘Wever-Croes’ lo conta. For di e anuncio di e ministro encarga cu Labor, cu e apoyo financiero na desempleado ta continua pa resto di aña sigur, den forma di FASE o TIO, nos por a saca e conclusion cu por lo tanto e aporte financiero via e reduccion di salario den gobernacion y entidadnan (semi)estatal tambe lo continua te sigur fin di aña, ya cu parti di e fondo pa e ayudo aki ta bin di e austerisacion den sector publico.

Nos por a ripara den medio y rednan social cu tabatin reaccion di insatisfaccion cu esaki, ya cu e ta haci cu tur hende ta realiza awor cu no tin duda mas cu e salarionan ta keda reduci, por lo menos manera nan ta awor. Por anticipa cu esaki lo por ta base pa cierto agitacion sindical, y politico, pero mirando e situacion actual realisticamente, esaki lo ta un ‘gepasseerd station’. Pa cuminza, no tin un mehoracion economico di tal grado, cu esaki lo duna gobierno mas recurso pa traha cune. Y si acaso gobierno haya un poco mas recurso e aña aki, anto tin mil y un otro cos pa haci cune. Pa pone e asunto cla y raspa: gobierno no por bolbe na e Afl. 735 miyon cu na 2020 lo a gasta cu personal, sin crisis di Covid. Ademas mester considera cu Aruba ta mara caba na e acuerdo di november 2020, cu por cambia pa loke ta cierto detaye, por ehemplo e organisacion y structuracion di COHO, pero e acuerdo ta keda y e reformanan den linea general lo no cambia. Unda por tin adaptacion y modificacion ta den e detayenan cu ta bin dilanti hustamente den e colaboracion entre e dos gobiernonan. Manera nos a vocifera anteriormente caba den e editorial aki, ta den e colaboracion Aruba tin e oportunidad pa coregi un rumbo eventual demasiado radical di banda Hulandes, pa duna esaki un direccion mas realistico. Esey ta conta pa varios area den e Reforma, manera enseñanza, mercado laboral y medida pa estimulo economico. Mihor nos sa kico nos kier, mas fuerte Aruba ta para, pero di bon manera y den un ambiente positivo, cu ta busca e mihor solucion pa nos como ciudadano.

Esey no ta implica cu lo no tin debate y bataya. Tin hopi punto cu lo ta dificil pa un politico local ‘bende’ cu su base social, pero esey ta semper. Un di e medidanan cu por cierto den e relato menciona a bin dilanti (casi) como un hecho, ta introduccion di un sistema di BTW (VAT), probablemente pa 1 di januari 2021. No cu e secretario di estado a bisa esey cu tanto palabra, pero bisando en todo caso cu “Pa e segundo uitvoeringsagenda a palabra cu yega na acuerdo lo sigui despues di un scenario di calculacion di sistema BTW, legislacion y accion di continuacion”. Tambe for di e formulacion di e tema aki den e ultimo informe di IMF tabata visible caba cu definitivamente nos ta bay den e direccion ey. Lo tin hopi hende den sector priva cu no lo bay gusta esaki, ta pesey tabatin tanto resistencia durante por lo menos dos decada contra e sistema aki, cu ta esun mayoritario na mundo, pero ta parce dificil pa cambia e rumbo ey ainda.

Ta parce nos cu den e seis luna cu falta ainda pa eleccion, e actual gobierno a scoge un ruta cu tin su riesgonan politico electoral, pero cu ta carga di otro banda e bentaha di opta pa interes di e mayoria den necesidad actualmente. Time will tell.

LEAVE A REPLY

Please enter your comment!
Please enter your name here