Durante un conferencia di prensa di ayera mainta, minister di Husticia, Andin Bikker a trece dilanti un peticion cu Gobierno di Aruba lo bay haci pa minister di Hulanda, Ferdinand Grapperhaus tocante e supuesto manipulacion di e rapport di e fayecido Mitch Henriquez.
Bikker a splica cu Gobierno di Aruba mustrando sosten na famia di difunto Mitch Henriquez, ta bay manda un carta pa Hulanda den cual ta bay pidi su Gobierno, den special minister di Husticia Ferdinand Grapperhaus, un splicacion riba un noticia alarmante publica e siman aki den un medio di comunicacion.
Segun Bikker, Inspectie Justicie en Veiligheid a resulta cu nan a manipula of suavisa cierto rapport, cual tres a wordo menciona y un di nan ta regarda e caso di Mitch Henriquez, loke a causa hopi indignacion den famia di Henriquez.
Asina mes, Bikker a anuncia cu ta bay pidi minister di Husticia di Hulanda pa su persona aclaria esaki y si Aruba por haya e documento den su totalidad, cu originalmente tabatin otro contenido. Segun Bikker a sigura e manera aki nan y e famia por haya sa kico specificamente a wordo adapta den e rapport.
El a trece dilanti cu na 2015, un noticia a conmove henter comunidad Arubiano, na unda un ciudadano Arubiano residencia na Hulanda, di nomber Mitch Henriquez, a keda envolvi den un situacion cu polis. Den esaki, a uza forsa y consecuencia di esey el a fayece. Tabatin caso den corte cu e agentenan a keda anonimo y finalmente a haya e sentencia di castigo, y e caso a bay te na Europees Hof.
Ademas, el a bisa cu e dia cu e noticia aki a ser publica den un medio di comunicacion social, su persona hunto cu minister di Asuntonan Social, Glenbert Croes a dicidi formula un carta cu lo manda pa Hulanda, pa haya un aclaracion y copia di e rapport completo, cu segun e medio di comunicacion a sigura, a ser adapta.
