Aruba ta riba un mihor caminda. Esey den sentido economico y pa loke ta salud publico. Nos ta saliendo di e medidanan tuma mas di un aña pasa y cu casi a bira un custumber pa nos. Ultimo fin di siman aki, un bon observador por a nota cu e bida anima turistico ta bolbiendo y e siman aki nos por mira e promer crucero cu pasahero a bordo yega Aruba. Nos ta bolbe pa e ‘normal’ normal? Den hopi aspecto si y nos por ta contento cu esey.

Sin embargo, no ta pasobra e parti mas dificil a pasa, di e crisis di Covid, esey ta implica cu nos ta bay ‘viento en popa’ na e bida cu nos tabatin na momento cu e crisis a asalta nos. Lo dura basta tempo promer cu tur hende cu a perde trabao lo ta emplea atrobe. Segun cu economia drecha lo tin menos necesidad di ayudo pa persona desemplea, y menos empresa chikito y mediano lo mester haci uso di e ayudo cu nan por haya. Bon pa nos tur, pasobra gobierno no mester fia tanto placa pa cera e buraco cu ainda tin den nos presupuesto pa e aña aki. E buraco ey no ta chikito, manera nos por a lesa ayera y awe for di e evaluacion di CAft pa e promer tres luna di 2021. Debe publico ta awor na algo mas di 5.200 miyon florin, pero pa fin di aña lo ta cerca di 6.000 miyon florin limpi, a base di loke di tur manera nos mester fia e aña aki ainda. Pa fin di aña nos debe compara cu GDP lo ta na 145%, segun presupuesto 2021, pero por ta cu e recuperacion por bay un poco mas rapido. En todo caso, segun CAft e corelacion di debe y GDP actualmente ta na 123%, plenamente den zona di peligro. Esey no ta tur, pasobra ta anticipa cu 2022 lo ta e aña unda e debe ta culmina, posiblemente cerca di 150%… Manera e expresion ta bisa: “it will get worse before it gets better”.

Ta posible cu e partidonan den e actual campaña ta realisa masha bon cu esun cu bin cu promesa exagera na e momento aki ta haci su mes ridiculo? Por ta cu esey tambe ta contribui na e ambiente menos anima, aunke principalmente e dos partidonan grandi ta laga nos kere cu tur cos ta OK pa nan y cu un di nan lo ta den proximo gobierno di tur manera? E ultimo aki sigur ta probable, pero talvez no den e forma cu ambos ta ambiciona, di goberna nan so. Y sigur ta tambe cu e cartanan riba mesa no ta mustra mescos pa tur dos. E partido den gobierno demisionario ta parce di tin varios elemento na nan fabor. A logra pasa den e crisis nunca visto aki, na un manera no perfecto pero razonable. E contrincantenan, no tur, ta acusa nan di a bende nan alma cu Hulanda, pero esey ta un argumento sin validez. Cualkier cu lo tabata goberna aña pasa, cu mas o menos grito di rabia o dolor, lo mester a cana e mesun caminda. Y awor tempran den aña economia ta cuminza mehora, cu ta brinda un perspectiva faborable pa e ultimo simannan te dia di eleccion. Ta keda si e disgusto di hopi cu e nepotismo cu ta florece sin tregua den e partido.

Di otro orden ta e situacion pa e rival tradicional den oposicion. Ta facil pa trata di pretende cu e casonan hudicial andando y otro na caminda, no ta afecta e partido. Den cada eleccion cu un partido kier o mester crece, bo mester convence hende cu biaha pasa a vota otro o no a vota, pa nan pone nan confianza den bo. E actuacion hopi insigur di e lider durante e debate siman pasa tabata papia pa su mes. No cabe duda cu e partido por mantene e nucleo di fielnan di semper, a fin y al cabo e ta un partido grandi, pero sigur un posicion di hegemonia pa por goberna nan so ta mustra hopi aleha di lo posible.

Esaki ta trece nos cerca e partidonan chikito. Aki tin algun cu ta duna muestra di realismo y cu ta acepta por ehemplo e acuerdo cu Hulanda como un realidad y ta mustra mihor den e encuestanan. Lo nan tin nan critica o deseo riba cierto detayenan, pero nan no ta perde tempo bringando e realidad ey cu ta gigantesco nos dilanti. Esey ta positivo pasobra e ta crea un base pa por traha den un gobierno, mejor dicho e gobierno cu lo bay sinta, pasobra e agenda di implementacion ta fiha caba. Loke si ta keda un interogante grandi ta e reparticion final di asiento, cu por faborece e dos partidonan grandi.

Bisando esaki, e cartanan ta baraha caba? No, y esey sigur pa un motibo. Y esey ta cu nos no tin encuesta cu realmente ta duna un refleho di henter e comunidad, pero tin nan ‘bias’ pa e tipo di publico cu ta interesa den e noticia cu e portalnan aki ta presenta, cu ta visible principalmente den e apoyo na e dos partidonan grandi. En todo caso, pronto nos lo sa cuanto ta cambia o cuanto ta keda mescos.

LEAVE A REPLY

Please enter your comment!
Please enter your name here