E interes y bienestar di tur studiante Arubiano na Hulanda ta keda un tarea cardinal di Arubahuis. Pa aƱanan Arubahuis pa medio di un team profesional na Onderwijszaken y di mentor a duna e guia necesario na e studiante di comienso di su estudio te cu na final na momento cu ela haya su diploma.

E guia di e studiante door di un mentor a cambia na februari 2015 ora cu Gobierno di Aruba a dicidi cu ta unicamente pa e prome aƱa e mentor ta encarga cu e guia di e studiante. Pa e resto di su estudio, e studiante mester por acudi na Arubahuis pa cualkier pregunta of problema cu e ta confronta cune. Arubahuis cu su experticio di hopi aƱa a purba di maneha e situacion aki mas mihor posibel.

Ta netamente esaki a pone cu Arubahuis a bin ripara cu e ultimo aƱanan e preparacion di nos studiante pa ora nan bin studia na Hulanda no tabata optimal. Esaki sigur despues cu Aruba a stop cu e programa PISA (Preparacion y Informacion na Studiantenan Arubiano) y e studiante mester a prepara su mes.

E situacion a conduci na un maneho di Arubahuis bou guia di ex minister Plenipotenciario Guillfred Besaril pa coi e timon den man y cuminsa cu informacion na e hobennan cu tin plan pa bin studia na Hulanda. E maneho aki tabata dirigi riba dos aspecto: informa e alumno den voor examenklas di HAVO y VWO riba escohencia pa un studio. E importante di e esaki ta cu un bon escohencia (studiekeuze) por evita cu un studiante ta cambia di estudio despues di e prome aƱa, loke ta un situacion serio bou di un gran parti di studiantenan Arubiano. Di dos angulo di e maneho ta pa duna informacion na e studiantenan cu ta cla pa bin Hulanda. Na e ocacion aki ta informa e studiante riba tur aspecto cu nan mester tene cuenta cune na momento cu nan yega Hulanda.

Vivienda

E situacion di vivienda bou di studiante a bira mas preta e ultimo aƱanan den combinacion cu e stagnacion riba e mercado di vivienda en general na Hulanda. Ta berdad cu Arubahuis a conoce un periodo cu tabata tin contractnan pa shortstay na diferente ciudad, manera Rotterdam, Den Haag, Utrecht, Delft y Breda. Arubahuis tabata para garantia pa e viviendanan aki y e studiante ā€“ cu no ta obliga pa tuma e camber – tin un aƱa pa por busca un otro vivienda. Den transcurso di tempo a bin cambionan cerca algun cooperacion di vivienda. Por ehempel Stadswonen na Rotterdam a bai falliet y e cooperacion cu a tuma over a exigi pa cambia e contract di es manera cu Pais Aruba lo mester a haci e administracion y asina carga un peso financiero hopi grandi. Gobierno di Aruba a haya e riesgo asina grandi cu NO por a bai di acuerdo cu un deal asina.

E caso na Den Haag tabata cu e shortstay nan tabata situa den un bario cu a conoce un decaida den transcurso di aƱa cu e studiementor a haye inresponsabel pa pone studiantenan den e casnan aki.

E shortstaynan na Utrecht tabata situa na Zeist cu ta pafor di Utrecht. Hopi studiante ta experencia esaki como demasiado leu for di nan scol, universidad of centro di ciudad.

Te ainda Arubahuis ta haci uso di shortstaynan na Delft (6 camber) y Breda ( 3 camber). Esaki ta pasobra e condicionnan ta hopi mas flexibel y e riesgo financiero pa Pais Aruba ta hopi chikito.

Loke ta bon pa remarca ta cu den tur e casonan di shortstay, Pais Aruba pa medio di Arubahuis ta para garantia. Den casonan cu e studiante no paga su huur e cobransa ta bin pa Arubahuis. Den pasado cu Arubahuis tabata responsabel pa e pago di ā€œmaandgeldā€ di Arubalening, por a usa e suma aki pa paga e retraso di huur. Actualmente e opcion ey no ta existi mas, pasobra e studiante ta ricibi desde augustus 2015 e suma di su Arubalening (termijnbetaling) directo for di Aruba y riba un cuenta bancario na Aruba.

Den luna di october 2022 lo cuminsa un campaƱa di conscientisacion na Aruba bou studiante na nan scolnan secundario door di e actual minister di EnseƱansa Endy Croes y Departamento di EnseƱansa. E campaƱa tin como meta pa duna conseho concreto kico pa hasi riba tereno di vivienda na Hulanda pa asina mehora nan posibilidadna pa haya un camber. Tambe lo enfoca na studiante pa keda realistico ora ta trata di vivienda.

Intencion di Arubahuis ta cu hunto cu nos mentornan papia cu studentenhuisvesting pa intermedia pa camber y ta zorg pa nos studiante por inscribi y haya nan BSN nummer.

Arubahuis ta sigura pa Departamento di EnseƱansa na Aruba ricibi e informacion actual y necesario pa por hiba un bon y fuerte campaƱa di conscientisacion bou di nos studiante.

Na otro banda Arubahuis ta papia continuamente cu Ombudsman pa asina pone atencion na Hulanda pa e posicion di nos studiantenan.

Minister Plenipotenciario Suplente mr. Ady Thijsen ta papiando cu diferente municipionan (gemeenten) pa duna atencion na e posicion di nos studiantenan aki na Hulanda.

Arubahuis su responsabilidad principal ta di duna informacion realistico. Ta pesey den un comunicado di prensa di dia 30 di juni ultimo, Arubahuis a informa e studiantenan cu ta biniendo Hulanda y cu no tin un camber of adres fiho pa pospone nan biahe pa Hulanda cu un aƱa. NO ta na Arubahuis pa bisa e studiante pa bin of no bin Hulanda, pero si e bin, e mester percura pa e ta bon prepara. Por ultimo Arubahuis ta lamenta cu a troce e texto aki y pone den un otro contexto.

E potret ta cortesia di Arubahuis

LEAVE A REPLY

Please enter your comment!
Please enter your name here