Arubahuis por mira bek riba un opvangweek 2019 sumamente positivo pa studiantenan nobo for di Aruba na Hulanda. Esaki ta sigur danki na e esfuerso y trabou incansabel di tur e mentornan di Arubahuis y di e miembronan di e diferente Plaatselijke Opvangcommissies (POC’s).

E studiantenan nobo for di Aruba a yega Hulanda e aña aki dia 31 di juli y 1 di augustus ultimo unda cu a start mesora cu e asina yama opvangweek den e diferente ciudadnan. Un grupo grandi di studiante di Aruba a participa na un siman yen di actividad y informacion como introduccion na nan bida nobo na Hulanda. E grupo mas grandi di studiante e aña aki tabata un biaha mas pa e regionnan den randstad manera Den Haag y Rotterdam.

E Plaatselijke Opvangcommissies di e diferente regionan a prepara un programa extenso y varia cu a inclui bishita na e instancianan relevante manera Gemeente, banco y DUO como tambe sesionnan di informacion y actividadnan social y cultural pa asina e opvangweek por ta un experencia completo pa e studiantenan nobo. Mester menciona cu e trabou di e mentornan y POC no a inicia na yegada di e studiantenan nobo pero tur mentor y POC tin varios luna di preparacion pa coordina e programa como tambe percura pa informacion yega na e futuro studiantenan hasta prome cu nan yegada na Hulanda. Tin varios mentor y POC cu den transcurso di aña ta duna informacion boluntariamente na futuro studiantenan durante un estadia na Aruba. Aunke e opvangprograma oficial di e diferente regionnan a finalisa ainda tin varios mentor y POC activo ta guia y asisti e studiantenan cu ainda falta vivienda of cu tin cualkier otro asunto pendiente cu mester wordo regla prome cu e aña escolar cuminsa.

Na final di e opvangweek e diferente opvangcommissies a evalua e siman y a ricibi feedback di e studiantenan nobo pa asina por inventarisa e puntonan di atencion pa e siguiente aña. Tambe diferente mentor a evalua e siman di opvang hunto cu nan POC’s y por a intercambia di idea pa mehora e organisacion y informacion. Aunke nos ta mira un mehoracion grandi compara cu añanan anterior ainda Arubahuis y mentornan ta constata tin varios studiante cu no ta bin prepara pa e reto nobo di studia y biba na Hulanda. A pesar di tur e informacion cu ta wordo duna riba medionan digital como tambe durante encuentronan informativo na Aruba por constata cu no ta tur studiante ta tuma bon nota di e informacion of cu e informacion pa un motibo of otro no ta alcansa nan. Aki ta trata den mayoria caso riba informacion y rekisitonan pa por haya vivienda, documentonan necesario cu mester trece for di Aruba y tambe procesonan via scol na Hulanda of e instancia di financiamento di estudio na Hulanda (DUO) cu mester a wordo inicia of completa na Aruba. Un bon preparacion ta keda un punto di atencion grandi y Arubahuis conhuntamente

cu Directie Onderwijs ta trahando duro pa optimalisa esaki pa asina por duna e informacion y sosten necesario na e scolnan na Aruba y na e futuro studiantenan.

Como futuro studiante nos ta conseha pa acerca e decanaat di bo school pa informacion y conseho, acerca Departamento di Enseñansa pa informacion, asisti na tur e encuentronan informativo cu scol y gobierno ta organisa y tuma bon nota di tur informacion cu ta wordo publica den medionan na Aruba y cu ta wordo comparti riba e diferente websites y riba social media. Pa loke ta informacion di Arubahuis, e mentoren na Hulanda como tambe e POC’s por check riba e website www.arubahuis.nl y e Facebook pagina’s @KabinetAruba y @OnderwijszakenArubahuis. E studiantenan por haya e contactinformatie di tur mentor riba e website di Arubahuis. Mayoria POC tambe tin nan mesun Facebook pagina pa comparti informacion cu studiantenan.

 

LEAVE A REPLY

Please enter your comment!
Please enter your name here