Parlamentario Rolando Brison (United St. Maarten Party) a presenta un mocion pa un Investigacion Parlamentario, esaki ta e prome den politica di Sint Maarten. E investigacion propone riba e propiedad Mullet Bay Sint Maarten lo dura 32 siman y lo costa 519.200 florin cual ta casi 256.000 euro.

E area tabata e locacion di Mullet Bay Resort, cu na e momento ey, tabata e dunador di trabou mas grandi na Sint Maarten cu 1800 empleado. Horcan Luis a destrui e compleho na 1995 y nunca a ser reconstrui. Na 2011 e compleho a ser completamente basha abou.

E propietario actual Sun Resorts Ltd, un empresa propiedad di empresario Iran Americano di 93 aña Hushang Ansary. E empresario tin e resort inclui den e bukinan di e compania di seguro Ennia pa 771 miyon florin. Segun Banco Central di Corsou y Sint Maarten, e balor real di e propiedad ta 89 miyon florin. Na 2018 Ministerio Publico a secuestra tres empresa propiedad di Ansary, y entre nan, tabata Sun Resorts.

E obhetivo di e investigacion ta pa investiga te na ki punto por extende e derechonan di e propiedad di Sun Resorts. E compania ta reclama e propiedad di Mullet Bay Pond, e beach y un parti di e oceano; algo cu segun ley, no ta posibel. E investigacion tambe mester determina si Sint Maarten por obtene e propiedad sea door di cumpra, e mesun, of un dominio eminente.

Como presentado di e mocion, Brison lo converti den e Presidente di e Comision di Investigacion, cu lo inclui miembronan di tur e fraccionnan y un miembro di Presidium. Brison ta sigur cu su mocion lo ricibi e mayoria rekeri a pesar cu e debate ainda no ta programa. E obhetivo ta pa debolbe Mullet Bay na e hendenan, segun Brison.

 

LEAVE A REPLY

Please enter your comment!
Please enter your name here