(WEAR) — Un homber Arubiano, Frederick ‘Rudy’ Franken, kende na 2019 a hinca mata su yiu homber di tres aña di edad na Florida, a ricibi sentencia di bida largo den prison, segun polis a informa na Merca.
Frederick Franken Sr., di 65 aña di edad, no a bringa e cargonan di asesinato premedita den prome grado y a ricibi sentencia di bida largo sin posibilidad di libertad condicional.
E incidente a tuma lugar dia 15 di maart di 2019, tempo cu Franken Sr. tabatin 61 aña di edad. Segun oficina di fiscal, Franken a manda su esposa potret di nan yiu homber di tres aña durante e dia. Tambe el a saca tur placa di su cuenta di banco, y a post su celular na su yiu muhe cu tabata biba na Aruba.
Autoridadnan ta bisa cu Franken despues a bay cas y a hinca mata su yiu homber, prome cu hinca su mes. El a drumi riba vloer cu su yiu pa asina su esposa, ora e yega cas for di trabao, hay’e, segun un comunicado.
Franken tabatin su brasanan rond di e mucha y un cuchiu den su man, segun oficina di Sheriff di Okaloosa a bisa den e dianan despues di e incidente.
Inicialmente a hospitalisa Franken den condicion critico, pero el a sobrevivi e intento di asesinato. Despues a arest’e pa asesinato.
Oficina di Sheriff di Okaloosa a investiga e caso, y fiscal Michelle Sandler a enhuicia e caso en nomber di Ginger Bowden Madden, fiscal pa e di Prome Circuito Hudicial.
Sandler a bisa cu husticia a prevalece pa e victima. “E trabao duro di oficina di Sheriff di Okaloosa a sigura cu fiscal por a garantisa cu Sr. Franken ta bay pasa e resto di su bida den prison pa su accionnan horibel den tuma e bida di su propio yiu.”
