Den e edicion aki nos ta trata un tema cu nos a yega di publica varios aña pasa, cu nos ta considera importante pa publica atrobe, añadiendo mas informacion al caso. Un di e asuntonan pa trata aki ta e eror bastante comun di mezcla e uso di singular y plural relaciona cu un sustantivo den un frase, unda e sustantivo ta sea singular o plural. Den un ehemplo: “Nan a pinta nos tur e problemanan, pero no solucion cu mester bin cune.” Tin un eror aki? Si, ta papia di e ‘problemanan’ (plural), mientras despues ta bira referi na e mesun sustantivo cu ‘e’ (singular) den e segundo parti di e frase. E frase corecto mester ta: “Nan a pinta nos tur e problemanan, pero no solucion cu mester bin cu nan.” Si nos pone atencion ora nos ta scucha un conversacion o entrevista, bo por observa cu den nos idioma papia hopi biaha e tipo di eror aki ta pasa bay sin cu ta ripara esaki. Sin embargo, ora di skirbi si nos por dedica mas atencion na skirbi esaki corectamente.
Otro caso mas o menos den e categoria aki ta e eror di scoge ‘su’ como e pronombre posesivo (bezittelijk voornaamwoord) incorecto. Den un frase: “Mi mes a hiba nan te na su cas.” E frase aki riba su mes no ta duna claridad. Kico por ta e problema? E frase por ta corecto, si ta trata di hiba e personanan na e cas di un di e personanan aki, o di otro persona, loke por conclui solamente for di e contexto. Pero, loke tambe por ta e caso ta cu ta referi na e cas di ‘nan’; unda e frase corecto mester ta anto: “Mi mes a baha nan na nan cas.” Nos tin e impresion cu e eror aki ta surgi ora un persona ta orienta riba e forma di pronombre posesivo na Spaño, unda pa e tercer persona plural (ellos, ellas) ta usa ‘su’ o ‘sus’: “Yo mismo los llevé hasta su casa.” Na Papiamento ‘su’ta referi solamente na e tercer persona singular.
Otro eror cu nos sa topa regularmente den nos medionan local, incluyendo nos propio corant, ta e uso eroneo di e palabra ‘la’ cu de hecho ta existi solamente como tono musical (do re mi fa sol la…). Kico ta e problema? Por ehemplo: “E la bay scol caba”; aki ta presumi incorectamente cu e ‘l’ ey ta pertenece na e ‘a’, pasobra ta pronuncia esaki asina, y talvez ta hunga un papel confusivo e similaridad cu e ‘lo’ cu ta indica futuro den nos gramatica: “E lo a bolbe caba, pero te awor ni su color.” Kico ta e caso? Den nos Papiamento di antaño tabata custumber pa skirbi ‘el’ y no ‘e’ como tercer persona singular, manera e ta ainda den e idiomanan di referencia (Spaño, Portugues). Nos hasta ta conserva te awe e ‘ele’ Portugues, den por ehemplo ‘cunele’ cu a haya e forma mas moderno di ‘cune’. Anteriormente tabata skirbi anto: “El a bay su cas” y “El lo a bay ayera”. Nos conoce un palabra di un solo letter (‘a’) cu ta indica den nos gramatica e pasado.
Finalmente, algo tocante e uso incorecto di palabra hopi parecido, pasobra nan ta bin di e mesun raiz, pero cu significado diferente. Un bon ehemplo ta e diferencia entre ‘disposicion’ y ‘disponibilidad’; tambe den forma di ‘dispuesto’ y ‘disponible’. ‘Disposicion’ ta referi entre otro na e actitud di por ehemplo acepta un peticion o encargo; den un frase”El a mustra disposicion pa eherce e puesto pa algun tempo.” Di otro forma: “E ta dispuesto di eherce e puesto pa algun tempo.” Disponibilidad ta referi entre otro na un persona cu ta disponible, es decir ta liber pa cumpli cu un peticion o encargo. Por ta trata tambe di cierto material o mercancia, cu ta ‘disponible’, esta cu e ta na benta o cla pa uso. Un persona por declara tambe, como contesta riba un pregunta: “Mi ta dispuesto y disponible”; loke ta clarifica e asunto completamente.
