Den e edicion aki di nos column tocante nos Papiamento un di nos topiconan faborito: en busca di nos raiznan indigena. E biaha aki no solamente na Aruba, sino tambe na Corsou. Esaki merece un splicacion. Nos a bin topa riba internet cu un publicacion di drs. Gerard van Buurt, patrocina pa University of Curaçao, den cual ta trata e presencia di gruponan di indigena Caquetio, te den siglo 18. Tambe e autor ta trata e presencia di palabra Caquetio den e Papiamentu di Corsou y den e Papiamento di Aruba. E publicacion yama: “Caquetío Indians on Curaçao during colonial times and Caquetío words in the Papiamentu language”. Promer edicion ta di 2014. E publicacion ta skirbi na Ingles y ta obtenible (gratis) riba e website: caribbeanfootprint.com. Nos ta bay haci referencia en corto na e obra, evitando copia parti di esaki, pa respeta derecho di autor, enfocando mas tanto riba e contribucion na conocimento encuanto palabra indigena, di origen Caquetio, cu ta parti di nos herencia na Aruba tambe, ya cu ta trata di e mesun pueblo, cu tabata na e islanan ABC y riba continente, entre otro na peninsula di Paraguana y parti di costa di Lago di Maracaibo.

Loke ta interesante di e historia di Caquetio na Corsou ta e hecho cu, contrario na loke mayoria di nos a siña den pasado, e poblacion indigena di Corsou no a desaparece completamente cu e yegada di e Hulandesnan na 1634, y e salida di e administracion – limita – Spaño di e isla. A keda segun e autor varios bario o vecindario indigena, entre otro e ta menciona Rooi Catochi y Brievengat, y dos pueblo na Banda Abou. E presencia di indigena Caquetio ainda den siglo 1800 ta significa cu den e epoca di formacion di Papiamento na Corsou, por a conduci na presencia di palabra Caquetio tempran den e Papiamento di Corsou. E poblacion indigena den un comunidad mayoritariamente di descendencia Africano a conduci na nan desaparicion como grupo separa. E proceso aki, di asimilacion cu gruponan di exterior, na Aruba y Bonaire a tuma lugar den un proceso hopi mas gradual. Consecuencia di esaki tabata cu na Aruba a keda conserva hopi mas di e nombernan indigena di lugar, mata y animal. Lamentablemente e idioma Caquetio no a sobrevivi como idioma bibo y ta existi solamente den algun lista di vocabulario limita na Venezuela.

Den e obra di van Buurt ta trata un serie di palabra di probable origen Caquetio. Nos atencion a bay riba algun cu ta sobresali pa nan presencia na ambos isla. Por ehemplo: ‘bushi’ cu nos conoce na Aruba como e nomber pa e cadushi den forma di un bola (especie di melocactus). Na Corsou e nomber ta existi como ‘bushito’ pero ta referi na otro tipo di cadushi ((Mammillaria mammillaris). E bushi mes na Corsou a haya e nomber ‘milon di seru’ pero en todo caso tin un indicacion cu e nomber ‘bushi’ tabata existi anteriormente na Corsou. E nomber ‘cadushi’ (Kadushi na Corsou y Bonaire) ta tambe di origen Caquetio. Tin un distincion entre e islanan: na Corsou loke na Aruba yama ‘cadushi’ yama ‘datu’ y ‘kadushi’ta e nomber pa loke nos ta yama ‘breba’.

Nos ta topa tambe cu e nomber (na Aruba) ‘waltaca’ cu na Corsou y Bonaire yama ‘totèki’ o ‘kaku’. E nomber toteki ta probablemente di origen indigena pero di continente, probablemente di ‘tuqueque’ o ‘tuteque’ na Colombia y Venezuela. E nomber waltaca si probablemente ta di origen Caquetio. Den e obra menciona no ta haci distincion entre toteki (waltaca) y loke nos ta yama ‘pegapega’, cu ta un especie diferente. E waltaca ta e ‘anolis lineatus’ y e pegapega ta di e especie conoci como ‘gecko’ , cu ta distingui pa su capacidad di pega na tur tipo di material, hasta glas. Pero e ‘lagadishi’ (probablemente di ‘lagartija’ (Spaño) o ‘lagartixa’ (Portugues), na Aruba ta otro especie atrobe (Cnemidophorus arubensis) endemico di Aruba. E macho adulto ta loke ta yama ‘cododo’ cu e famoso color blauw.

Tambe di origen Caquetio ta nos ‘kwihi’ internacionalmente conoci como ‘mezquite’ (Prosopis juliflora). Na Venezuela e ta conoci como ‘cují yaque’ y na Colombia como ‘trupillo’. Un mata emblematico di nos region, tanto na costa di Venezuela como region di La Guajira na Colombia.