Minister di Finanzas, Asunto Economico y Sector Primario mr. Geoffrey Wever ta anuncia destaho publico pa desaroyo di e edificio di ex-Esso Lagoen como boutique restaurant.
Gobierno di Aruba ta sigui duna forma na su vision pa revitalisa centro di Oranjestad cu e anuncio di un proceso di destaho publico pa e desaroyo di e edificio di ex-Esso Lagoen como un boutique restaurant.
Durante un conferencia di prensa na e localidad, Minister di Finanzas, Asuntonan Economico y Sector Primario, mr. Geoffrey Wever, a enfatisa cu e proyecto ta forma parti di un vision integral pa fortalece centro di Oranjestad como un destino atractivo pa bishitantenan, empresarionan y inversionistanan.
“Nos kier un centro urbano unda historia y desaroyo ta bay man den man. Un ciudad unda nos ta conserva nos patrimonio cultural cu orguyo, mientras cu nos ta crea espacio pa inversion, innovacion y actividad economico,” segun Minister Wever.
E propiedad, anteriormente conoci como e stacion di Esso Lagoen, ta representa un oportunidad importante pa duna un destino nobo na un sitio cu pa hopi aña a keda sin un funcion activo. Cu e destaho publico, Gobierno ta busca un partner strategico cu tin e experiencia, vision y compromiso pa transforma e localidad den un proyecto cu ta agrega balor na centro di Oranjestad y na economia di Aruba den forma di un boutique restaurant.
E iniciativa ta sigui otro proyecto di revitalisacion den centro di ciudad, manera e embeyecemento di Plaza Comercio na Columbusstraat y e restauracion di monumento historico Cas Veneranda. Gobierno ta busca pa duna luganan cu anteriormente tabata subutilisa un proposito nobo, contribuyendo na un Oranjestad mas bibo, atractivo y economicamente fuerte.
Den e proceso di destaho, Gobierno lo enfoca riba varios criterio importante, incluyendo e integracion cu e desaroyonan existente den centro di Oranjestad, e calidad di e espacio urbano, e impacto economico y sostenibilidat. Entre otro, e principio di ‘Build with Nature’, lo ta un criteria importante durante e evaluacion. E principio tin como meta pa stimula un desaroyo cu ta logra un balans entre crecemiento economico y proteccion di medio ambiente.
Segun Minister Wever, un centro urbano activo ta crea oportunidad pa inversion. Diversifica acion di nos economia y empleo pa empresarionan local, fortaleciendo e posicion di Oranjestad como e curason comercial di Aruba.
Gobierno di Aruba ta invita tur partidonan interesa cu cumpli cu e criterianan di participa den e proceso di destaho publico, cu lo wordo conduci conforme cu principio di transparencia, competencia husto y igualdad di oportunidad.
