VRA (Vereniging Rijschool Aruba) a uni pa asina trece nan preocupacion dilanti pa locual ta trata e problema cu tin ora di saca rijbewijs. Nan a bay den union pa trece solucion y ta un voz pa e preocupacionnan den comunidad.

Rolando Maduro, presidente di VRA a duna di conoce e problema y a expresa e kehonan cu tin diariamente di persona cu ta tuma les di e rijscholen di Aruba. Keho cu servicio na bureau di examen no ta esun optimal, pasobra te ainda ta cay bou di KPA.

El a splica cu den pasado, persona tabata pasa examen na San Nicolas y Playa, pero pa centralisa, nan a dicidi Santa Cruz – pa asina nan haya e rijbewijs di biaha. Sinembargo e servicio a keda atras y e sistema a keda mescos.

VRA a bisa cu tin cierto problema ora di pasa examen , caminda tabatin un lista di espera cu a bay te 9 luna, algo cu ‘tabata inaceptabel’ despues di a haci tur lo posibel. Mirando e situacion a bay over na sistema nobo cu tecnologia.

“Ta keda un problema cu hende constantemente ta bin dilanti. E servicio ta tuma mita dia di trabou pa inscribi, pa ora nan ta eynan cu e sistema ta cay afo, of ta dura tres ora prome cu examen di rijbewijs”, e ta splica.

Nan ta consciente cu e departamento no tin suficiente personal pa traha. “Petje af pa esunnan cu t’ey y haci nan best.” Pa e motibo aki, nan di VRA kier trece e solucion pa e problema cu tin pa saca rijbewijs.

E aporte na e mehoracion di nan servicio, e ta splica cu ta duna les awendia cu tecnologia y di forma digital. Mester a warda varios aña pa introduci e na Aruba. Nan a purba 180 candidato cu e sistema nobo pa evalua y mehora, pero no a logra pa mehora e forma digital.

Tambe a duna sugerencia na KPA. Nan tin cu bin cu soluciona pa e tardansa ora di haci examen cu tin cu warda, y si no haal esaki tin cu warda dos luna atrobe pa bolbe ripiti. E servicio tambe ta keda cay, segun Maduro.

Maduro a duna ehempel manera e sistema di Censo, caminda bo ta registra y duna informacion pa haya bo cedula of paspoort y servicio ta bay lihe.

E ta bisa cu den pasado a reuni cu KPA pa asina tuma decision, pero esaki no a pasa y departamento no a ehecuta locual a palabra riba mesa E ta expresa cu esey ta demotivante pa nan, pa motibo cu ora nan ta duna les, tin ‘keho di studiante cu mester wordo atendi’. E ta bisa cu mester mas structura, resolve y aporta. Nan kier sinta cu tur e departamento concerni sea KPA, minister y VRA pa trece e punto dilanti.

“Lamentabel ta bisa cu cuerpo policial ainda no a yama ningun reunion pa comision pa asina cuminsa traha y atende e problema. Nos a manda carta y no a haya ningun contesta. Nan no ta tum’e na serio”, Maduro ta splica.

Thomas Ruiz, secretario di e bestuur a bisa cu nan a dicidi pa cera forsa pa asina sinta na mesa cu KPA y minister.

Ruiz a duna un bista mas amplio di e problematica cu nan tin mirando cu antes tabata usa e buki blauw pa examen. Sinembargo awo tin e lista di ley, cada rijschool mester tin e material prepara di calidad pa examen. Esey a trece cune discusion grandi na momento di introduccion, pero nan dicidi di uni pa proba traha material conhuntamente y miho cu ta posibel. “E cambio cu a bin den ley no ta tur a wordo introduci un solo biaha den examen mes.”

VRA ta luchando pa aumenta calidad di rijbewijs, con ta revisa examen. Tambe ta conscientisa esunnan cu ta pasa rijbwewijs cu nan no ta siña pa pasa examen, pero cu mester aplica e reglanan di trafico pa bida largo, ‘hende ta slaag pa produci chauffeur’.

E ta expresa cu nan ta bringa e interes di nan miembro di rijschool pa asina tur cos por bay miho. Nan mes ta lucha pa nan mes por duna e miho servicio, pa un sistema digitalisa den cual hende por tin mas facilidad y spaar tempo.

Si un persona mester di cambia fecha, por haci esaki cu otro persona cu tabatin prome pa asina no mester warda hopi. Nan ta bisa cu nan kier ta participe di e decision cu KPA y minister tuma, mirando cu ta nan ta esunnan cu ta prepara hende pa examen.

Tambe nan kier haci e servicio y proceso mas facil pa e persona cu ta 60+, of tin autismo pero por core auto. “Nos ta defende derecho di e grupo aki, no por discrimina, pero mester tin cambio cu ta flexibel y organisa pa nan tambe y yega na solucion”, Ruiz a bisa.

Den union nan ta bisa cu ta spera di por drecha tur e problema aki cu esunnan concerni pa asina trece e mehoracion den servicio. Pa tur esunnan cu mester mas informacion of tin algun pregunta por tuma contacto cu nan na 594-4194 ‘nos t’ey pa informa y duna sosten’.

LEAVE A REPLY

Please enter your comment!
Please enter your name here