Reunionnan cu formador di gobierno minister presidente demisionario Evelyn Wever-Croes ta sigui tuma luga den dianan aki, ayera tabatin como invitado diferente stakeholders cu a trata e topico di migracion y diferente puntonan cu ta envolvi den esaki.

Asociacion Venezuela/Bolivar por la Vida ta un di e fundacionnan cu tabata presente den reunion aki na unda su presidente Antonio Alcibiades a trece dilanti informacion con e reunion cu formador a bay y diferente puntonan specificamente cu tabatin di haber cu frontera y refugiadonan di nacionalidad Venezolano cu ta na Aruba.

Alcibiades a expresa e problematica cu nan tin debi na ceramento di frontera cu Venezuela na unda Venezolanonan ta presenta inconveniente pa cu esaki, mesun cos cu Aruba segun loke el a sigura.

A pesar cu Venezuela for di algun añanan pasa ta bin presentando diferente problemanan pa loke tin di haber cu crisis humanitario, social, politico y economico cu a trece como consecuencia e fenomeno grandi di migracion na unda hopi Venezolano mester a sali for di nan pais pa e motibonan aki Alcibiades a pone enfasis riba un tema cu segun el a afirma ta hopi importante pa su persona, el a bisa cu na Aruba tin dos radio emisora cu tur dia ta papia den contra di gobierno di Venezuela cu den su opinion, esey no ta afecta solamente e gobierno di Venezuela sino cu tambe esey ta afecta e grupo di Venezolanonan cu ta na Aruba.

“E programanan aki cu ta wordo transmiti un den oranan di merdia y otro den oranan di atardi den otro emisora ta pone su drop di veneno tur dia riba pueblo di Aruba”, Alcibiades a indica cu esey ta efecto negativo cu tur dia e hende ta haya riba e medionan aki.

El a bisa cu den e programanan aki ta ataca e gobierno di Venezuela y cu nan ta sembra odio papiando tur cos negativo na unda e mes a afirma cu su persona a sufri atakenan di personanan di nacionalidad Venezolano opositor, aunke el a afirma cu e no ta apoya gobierno Bolivariano di Venezuela.

Di mesun manera, el a afirma cu “casi ningun Venezolano cu ta bin akinan cu no ta wordo persigui ta cualifica pa tin status di refugiado y cu tin biaha cu ACNUR ta bira complice pa wega politico pa duna status di refugiado na personanan cu no ta berdaderamente un refugiado”, el a sigura.

Pa cu esaki, reportero di Bon Dia Aruba a pidi pa Alcibiades duna un clarificacion pa lo cual el a señala cu e situacion aki no ta sosodiendo na Aruba solamente sino cu tambe na diferente pais rond di mundo na unda Venezolanonan ta emigra pa e situacion di e pais cu manera el a sigura “tin un situacion precario debi na e blokeo y atakenan cu tin contra Gobierno di Venezuela ta hopi pais ta haci wega y vooral ACNUR”.

Bon Dia Aruba a haya riba e website di ACNUR Agencia di Nacionnan Uni pa Refugiado (UNHCR) cu 5.4 miyon di persona ta refugiado y migrante Venezolano rond di mundo y mas di 800.000 ta solicitante di asilo politico.

Di mesun manera, na Aruba ta existi diferente fundacionnan cu ta encarga di yuda e comunidad di migrantenan specialmente esunnan di Venezuela como por ehemplo Fundacion Vene Aruba Solidario y Fundacion Venezolanos en Aruba cu no a wordo invita pa e reunion cu formado, Bon Dia Aruba a puntra Alcibiades si su fundacion tin contacto cu e otro fundacionnan aki cu ta haci diferente actividad pa recauda fondonan y yuda migrantenan y tambe henter comunidad cu tin necesidad na unda el a contesta cu den ultimo dos aña nan no a haci esey, “tabata dos aña dificil den tempo di pandemia y nos a stop di reuni constantemente, nos ta conoce e miembronan di otro fundacionnan cu tin hopi mas tempo cu nos pasobra nos a bin despues cu otro idea, pasobra mi no tabata kere den e trabou di algun fundacion cu solamente nan ta percura pa haci actividadnan di Bingo, nos fundacion ta Todos por la Vida”, el a afirma.

Alcibiades a manifesta cu su fundacion ta pa traha pa comunidad y naturalesa, esey ta un di e propositonan di su fundacion.