Den un entrevista cu Rayenne Hernandez, directora di UNOCA, Sra. Hernandez a splica e tres puntonan di mas interes cu UNOCA a presenta durante e reunion cu formador di gobierno, y con UNOCA ta desea pa yega na un areglo mutuo cu gobierno pa e mehoracion di educacion cultural na Aruba.

Un di puntonan di prioridad ta e fondonan cu UNOCA tabata ricibi den pasado, cu den ultimo añanan a mira un cortamento significante pa e sector cultural. UNOCA tabata ricibi anualmente 1.2 miyonn florin pa inverti den e sector cultural. Na 2017 esaki e suma aki a wordo corta cu 300 mil florin, sin ricibi un splicacion, haciendo cu UNOCA mester a reduci gastonan operacional pa no afecta e sector cultural.

“Nos a keda un paar di aña e ora ey cu e suma di 900 mil florin pa aña, cu eigenlijk ta hopi tiki pa e sector mirando cu e sector mes tin un demanda di mas o menos 3 miyon florin pa aña. Nos lo kier wak, ora cu gobierno bay trata e presupuesto pa loke ta trata cultura, pa nan por re-inverti loke UNOCA a perde eigenlijk durante e añanan cu a pasa, pasobra e 300 mil florin eynan cu a wordo kita for di e presupuesto, nos no a haya un splicacion nunca cune, pakico a corta. Y hasta si tabata un biaha so, na 2018, 2019 nos lo mester a hay’e back, pero e no a bin back tampoco, dus esey tabata e parti cu nos a trece dilanti”, Sra. Hernandez a splica.

Adicionalmente, Sra. Hernandez ta splica cu na 2020 ora cu e pandemia a cuminsa na Aruba, UNOCA tambe haya korting atrobe, a corta un biaha mas. Den e presupuesto pa e periodo di april te cu december 2020 a corta 12.6% cual a haci cu e suma disponibel pa UNOCA a bira 880 mil y na 2021 tambe 12.6% cu a wordo kita di empleadonan publico tambe a wordo kita di e fundacionnan cu ta ricibi subsidio di gobierno; “kiermen e ora pa e periodo di 2021 UNOCA lo ricibi solamente 800 mil florin di cual nos tin gastonan operacional y di cual bo tin e proyectonan cu nos mester co-financia anto atrobe mirando cu ya caba nos a corta hopi caba den añanan prome den loke ta gastonan operacional, e ta haci cu e sla mas duro ta bay cay atrobe pa e sector cu no ta bay haya e suficiente fondonan pa nan proyectonan cultural”, el a agrega.

Otro hopi importante cu trese dilanti ta educacion cultural. Sra. Hernandez ta bisa cu pa hopi aña gobiernonan ta menciona cultura y ta menciona tambe educacion pero nunca a structura esaki debidamente caminda cu por wak cultura ta drenta den enseñansa formal y informal. “Dus enseñansa formal ta ora nos ta papia di scolnan di kleuter te scolnan avansa manera universidad, pero tambe educacion informal, dus pafo di scol, paso informal ta conta pa adulto y mucha eigenlijk caminda tampoco no tin suficiente caminda cu nos por bay pa haya educacion cultural na e comunidad, nos kier wak mas atencion ariba loke ta educacion cultural, y no solamente den palabra pero tambe den hecho”, el a bisa.

Sra. Hernandez ta splica tambe cu pa por tin un bon mehoracion den educacion cultural, ta importante pa pone cultura y enseñansa hunto. “Den pasado hopi biaha cultura a wordo mara cu turismo, economia, deporte, pero nos no a wak ainda cultura cu enseñansa. Den reino, si bo bay wak bon, Hulanda, Sint Marten y Corsou, nan tur ta conta cu minister di enseñansa y cultura hunto y Aruba no tin esaki ainda dus esaki ta nos speransa”.

E ultimo punto di ineteres cu Sra. Hernenadez a splica ta cu UNOCA a pidi formador e oportunidad pa tin e libertad pa yega na areglonan cu otro paisnan, por ehempel of kisas Union Europeo pa UNOCA por haya mas fondo pa cultura. “Nos ta wak cu por ehempel Cede Aruba tin esaki caba, cu nan ta ricibi fondonan di Hulanda pa nan por inverti den e tereno social, pero mirando cu na Aruba e fondonan mes ta limita nos lo kier explora e posibilidad pa busca fondo afo tambe di Aruba pa asina nos por inverti den cultura, mirando cu aworaki den cuadro di subsidie verordening esaki no ta posibel pa UNOCA”, el a bisa.

Formador di gobierno a duna UNOCA tambe e tarea pa presenta na gobierno un consehonan of ideanan ariba kico ta e miho forma cu por mehora den loke ta e parti di educacion cultural y tambe. “Esey ta loke formador a pidi di nos, pa nos bay traha ariba un documento caminda cu nos por duna ideanan mas concreto di kico ta loke nos por haci riba e sector aki”, Sra. Hernandez a bisa.

“Mirando cu e tarea ey a wordo poni den nos scochi, nos ta bay papia cu expertonan tambe pasobra e no mester ta algo cu tin cu bin solamente di parti di e sector cultural, pero e mester ta un combinacion di e sector cultural y di enseñansa hunto. Ta hopi esencial pa nos por comunica debidamente cu departamento di enseñansa pa nos por yega na ideanan concreto con nos por haci esaki paso na mesun momento bo ta haya un curiculo di scol cu ya caba ta yen di materianan cu e muchanan tin cu tuma, dus aworaki nos kier pone un atencion pa loke ta arte y cultura”, el a agrega.

Sra. Hernandez ta bisa tambe cu UNOCA ta enfoca ariba e parti di arte tambe cu ta importante pa lanta ciudadanonan creativo; “Creatividad no ta algo cu bo ta usa solamente pa bo pinta of pa bo traha muziek of pa bo traha un escultura, pero creatividad bo ta usa den tur aspecto di bo bida. Desde con pa maneha cu placa te cu ki decisionnan bo ta bay tuma pa sali creativamente for di un problema, pasobra ta yega momento den bida cu bo mester ta creativo pa bo por bin cu solucionnan cu ta yuda bo den tur aspecto di bida”, el a bisa.