(AP) — E prome astronauta di Turkia hunto cu un Italiano y un Sueco a despega ayera pa Stacion Espacial Internacional (ISS) riba un vuelo charter di SpaceX.
E raket Falcon a despega for di Kennedy Space Center di NASA atardi laat, transportando e tres homber, tur cu experiencia anterior como piloto militar y representando nan paisnan. Nan acompañante di biahe: un astronauta retira di NASA cu awo ta traha pa e compania cu a regla e vuelo priva.
Nan capsula lo mester alcansa ISS mañan. Nan ta bay pasa dos siman haciendo experimento, combersando cu muchanan den edad escolar, y admirando e bista di Tera, prome cu bolbe cas.
Esaki ta costando cada un di e tres pais $55 miyon of mas. Esaki ta e prijs pa cada persona pa e biahe, e di tres biahe asina organisa pa e compania di Houston, Axiom Space cu NASA y SpaceX. Rusia ta bin ricibiendo bishitantenan cu ta paga pa yega ISS pa mas cu dos decada. NASA no tabata hacie sino te dos aña pasa.
Alper Gezarvci di Turkia, un ex-piloto di combate y capitan di Turkish Airlines ta e prome persona di su pais pa bay den espacio. El a nota cu Turkia a caba di celebra su di 100 aniversario, y te awo, e bista di shelo pa e nacion tabata limita na “loke nos por mira cu nos wowo sunu.”
Tambe den e vuelo: Marcus Wandt di Suecia, un ex-piloto di combate y piloto di test pa Swedish Aeroplane Corp. kende a keda scogi na 2022 como astronauta di reserva pa Agencia Espacial Europeo (ESA) y Col. Walter Villadei di Forsa Aereo Italiano, kende a bula den frontera di espacio berano ultimo cu Virgin Galactic.
Entre e obhetonan simbolico cu nan ta hibando: Un medaya di Premio Nobel for di Suecia, pasta fusilli di Italia, y articulo di cultura nomadico di Turkia.
Hunto cu nan ta Michael Lopez-Alegria, kende a despega cuatro biaha como astronauta di NASA prome cu a join Axiom Space y compaña su prome vuelo charter.
