(AP) – Sheryl Sandberg, kende a yuda transforma Facebook for di un startup tecnologico den un imperio di aviso digital, ta bay retira for di e hunta di Meta, compania mama di Facebook.
“Cu un curason yen di gratitud y un mente yen di memoria, mi ta laga e hunta di Meta sa cu mi no ta bay postula pa reelecion mei proximo,” Sandberg a skirbi den un post riba Facebook.
Sandberg a bandona Google pa join Facebook na 2008, cuatro aña prome cu e compania a bira publico. Como e ehecutivo No. 2 na Meta bao di CEO Mark Zuckerberg, Sandberg tambe a ricibi hopi critica pa algun di su erornan mas grandi.
El a retira como Chief Operating Officer di Meta na 2022 pero a keda como miembro di hunta di e compania. El a fungi como COO di Facebook y despues Meta pa 14 aña y mey y como miembro di e hunta pa 12 aña.
“Bao liderazgo di Mark, Javi Olivan, Justin Osofsky, Nicola Mendelsohn, y nan team a proba sin ningun duda cu e negoshi di Meta ta fuerte y bon posiciona pa futuro, pues esaki ta sinti como e momento corecto pa retira,” Sandberg a skirbi.
El a bisa cu e ta bay continua sirbi como consehero pa e compaina.
Aña pasa, Sandberg a anuncia cu e tabata lansando un programa di liderazgo pa mucha muhe a traves di su fundacion pa responde na loke e ta yama desigualdadnan di genero. E programa di liderazgo ta inclui un curriculum pa scol secundario como tambe recursonan pa adulto. Lean In ta un proyecto di Sandberg Goldberg Bernthal Family Foundation, e fundacion priva cu Sandberg a cuminsa cu su difunto esposo, Dave Goldberg.
