China ta bisa cu su astronave Tianwen-1 a drenta un orbita di ‘parking’ temporal rond di Mars den anticipacion di aterisa un rover riba e planeta cora den proximo lunanan.
Administracion Espacial Nacional Chino a bisa cu e astronave a ehecuta un maniobra pa ahusta su orbita mainta trempan diaranson ora di Beijing, y lo keda den e orbita nobo pa e proximo tres luna prome cu intenta un aterisahe. Durante e tempo ey, lo traha mapa di superficie Marsiano y lo usa su camara y otro sensornan pa colecta mas data, particularmente tocante su sitio di aterisahe prospecitvo.
Esaki despues di e aterisahe di e US Perseverance rover diahuebs ultimo cerca di e delta di un riu antiguo na Jezero Crater pa busca pa señal di bida microscopico antiguo.
Un intento exitoso pa aterisa e Tianwen-1 lo converti China den apenas e segundo pais tras di Merca pa aterisa un astronave na Mars. E vehiculo Chines di energia solar, tamaño di un golf cart, lo colecta data riba awa bao tera y busca evidencia cu e planeta por a tin bida microscopico den pasado.
Tianwen, e titulo di un poema antiguo, ta nifica ‘buskeda pa berdad di Shelo’.
Aterisa un astronave riba Mars ta notoriamente dificil. Alrededor di un decena di orbiter no a logra. Na 2011, e orbiter Chines bayendo na Mars cu tabata parti di un mision Ruso no a sali di orbita Terestre.
E intento di China lo involucra un parachute, raket, y airbag. Su sitio di aterisahe proponi ta un plano amplio yen di piedra yama Utopia Planitia, unda e lander US Viking 2 a aterisa na 1976.
E yegada di Tianwen-1 na Mars dia 10 di februari ultimo tabata precedi pa esun di un orbiter di Emirato Arabe Uni (UAE). Tur tres di e misionnan mas recien a wordo lansa na juli pa saca bentaha di e alineacion cercano entre Tera y Mars cu ta tuma luga solamente cada dos aña.
Tianwen-1 ta representa e mision mas ambicioso te awo di e programa espacial Chino secreto, vincula cu militar, cu prome a pone un astronauta den orbita rond di Tera na 2003 y aña pasa a trece piedra Lunar back na Tera pa prome biaha desde añanan 1970s. China tambe tabata e prome pais pa aterisa un astronave riba e banda scur di Luna, tiki explora, na 2019.
China tambe ta construyendo un stacion espacial permanente y planeando un mision Lunar cu tripulacion y un posibel base di investigacion permanente na e Luna, maske ainda no a propone un fecha.
Dialuna a move un raket Long March-5B Y2 enorme na su luga na e sitio di lansamento di astronave Wenchang na provincia di Hainan pa asemblahe y test prome cu esaki lansa e modulo nuclear di e stacion espacial, yama Tianhe. Lansamento ta programa pa e prome mita di e aña aki, e prome di 11 mision programa pa proximo dos aña pa construccion di e stacion.
China no ta participante den Stacion Espacial Internacional, parcialmente riba insistencia di Merca.
E programa espacial ta un fuente di orguyo nacional enorme na China, y Tianwen-1 a atrae un siguimento particularmente fuerte entre e publico. Turistanan a yena e isla tropical Hainan pa mira e lansamento, mientras otronan ta bishita colonianan na Mars falso den sitionan desierto cu domonan blanco, airlock y trahenan espacial.
