Tin un discusion serio andando den sector di cuido di persona di edad entre e fundacion mas grandi di cuido y e mandatario responsable di e cartera concerni. Manera e ministro a indica den un reciente rueda di prensa, e asunto aki por resulta cu solamente perdedor. Esey lo ta indica cu e ta desea di resolve problema existente, pa logra e meta ey. E mandatario a presenta un lista di cinco punto clave cu e ta considera necesario pa atende e asunto. E puntonan ta: 1. Gobierno ta stipula maneho; 2. Gobierno ta scoge instancia pa ehecuta maneho; 3. Pa ehecuta maneho e instancia ta ricibi subsidio di Gobierno; 4. E instancia mester duna cuenta financiero na Gobierno mirando cu subsidio ta fondo publico; 5. Gobierno na su turno ta duna cuenta di fondo publico na Parlamento.
A primera vista e puntonan aki ta parce logico pa duna cuadro na e trabao conhunto. Sin embargo, hasta si ta acepta esaki pa por dialoga, no necesariamente tur e puntonan aki lo haya un aceptacion completo na mesa. Laga nos pasa den nan pa splica kico ta parce nos posible punto di discordia, y di diferencia di opinion hustifica.
Gobierno ta stipula maneho. Esey en general ta berdad, finalmente e mandatario concerni, mester stipula un maneho pa gobierno. Sin embargo, con bo ta yega na tur informacion necesario pa un bon maneho? Promer pensamento lo ta pa sinta na mesa cu e partidonan interesa, y esey na promer lugar ta e instancianan cu ta duna cuido den e sector aki. Si un gobierno ta desea di implementa un maneho cu no ta carga aprobacion, por lo menos parcialmente, di e actornan principal, gobierno ta haya su mes cu e problema cu e mes lo mester bay organiza su cuido pa anciano… E punto clave ta cu gobierno, en todo caso te awor, tabata kier exactamente evita esey, basa riba e pensamento cu e instancianan cu ta opera den e tereno aki lo por haci un mihor trabao cu gobierno mes lo haci. Esey no ta cambia nada na e punto di salida importante, y esey ta cu gobierno tin un responsabilidad pa percura pa cuido adecua pa su ciudadanonan di edad cu mester cuido. Si un gobierno no tin intencion di organiza henter e cuido su mes, anto ta necesario pa yega na un base comun cu e operadornan den e sector. Ningun partido por djis lanta di mesa bay y laga e asunto colga den aire. Pues e ponencia cu gobierno ta stipula maneho mester ser interpreta un poco mas amplio cu loke e ta aparenta aki.
Gobierno ta scoge instancia pa ehecuta maneho. Aki atrobe e ponencia por keda mal interpreta. Den hopi caso, e instancianan den e sector tabat’ey promer cu e ministro. No ta cuestion di tin un sector completamente nobo unda ta bay traha cu instancia cu ta acepta y ehecuta e maneho manera e ministro a stipula. Claro cu e lineanan general di maneho mester ta algo cu tur instancia den e sector mester por acepta, pero ta keda semper un cantidad di detaye menor unda tin diferencia di opinion, sin cu esaki mester conduci na un calamidad. En todo caso, si gobierno no ta crea instituto nobo pa ehecuta e maneho stipula al pie de la letra, anto e lo mester traha cu esun cu t’ey.
Subsidio di gobierno, algo indispensable, pero e tin dos banda. Pa haya subsidio, un instancia mester cumpli cu e condicionnan di e subsidio, loke ta encera entre otro maneho y reportahe tocante nan administracion di e fodonan ricibi. E punto aki a bin dilanti varios aña pasa caba, y ta mas cu obvio cu gobierno por stipula e manera con y ki ora ta desea di haya e cifranan presenta. Di otro banda, como cu gobierno tin e responsabilidad di percura pa cuido adecua, no por mira subsidio como un fabor, mas bien un acuerdo entre dos partido unda ambos ta bon consciente di nan responsabilidad. E sector no ta simplemente patrimonio di gobierno.
Esaki ta trece nos tambe riba e tereno mas strategico, algo cu mester atende di e mihor forma, mirando e desafionan nos dilanti. Por ehemplo, ta necesario pa planifica pa un futuro cu hopi mas anciano, unda mantene nan mas tanto posible fuera di internacion den un instituto specializa ta un meta importante. Nos tur por ta di acuerdo cu mantene hende di edad den un ambiente social mas ameno, preferiblemente cerca di nan famia, ta un meta comun importante. Esaki riba su mes lo bira un tarea pisa, mirando e estado di salud en general di nos poblacion y di nos hendenan di edad en particular. E mesun estado di salud malo ey lo impedi hopi hende di edad pa sigui traha o tuma cualkier actividad voluntario pa nan encargo, loke ta haci e meta di mantene hende di edad activo bastante dificil. Tambe nos por observa cu practicamente no tin mobilidad pa hende di edad cu no tin nan propio transporte, tambe pasobra e infrastructura no ta permiti esey. E imagen di Europa unda tur dia por mira un cantidad di anciano riba nan scoot mobile ta sali pa haci compra, traha o topa cu amigo y conocir, lo ta algo cu nos no ta bay mira aki. Ta bira bon cla anto cu e asunto aki no ta toca e cartera aki so, sino varios otro… Unda e trabao conhunto ta keda…?
