Ayera Aruba Tourism Authority (ATA) a celebra e di 30 edicion di Conferencia Anual di Turismo Aruba (CATA) destina pa nos partnernan turistico di e mercado Latino Americano den forma virtual debi na e situacion actual di e pandemia di Covid-19.

Aunke e contacto fisico ta hunga un rol den e tipo di conferencia aki cu ta busca crea y fortalece aliansa y relacion cu nos partnernan Latino Americano, toch ATA a percura pa transmiti cerca cada un cu a sigui e conferencia aki online, un poco di e calor di nos hendenan y di nos isla, haciendo uzo di diferente video.

E videonan no solamente e enfoca riba nos producto turistico, sino riba e medidanan di bioseguridad cu a keda introduci pa atende cu nos bishitantenan prome cu nan ta biaha y durante nan estadia riba nos isla. Te hasta nan a bin cu un yamativo video di nan campaña di promocion cu lo wordo introduci ora cu Aruba ta habri nos frontera pa e region aki cu ta e di dos mas importante pa nos industria turistico.

ATA Latino America

Directora di ATA pa Latino America, Miriam Dabian a fungi como MC di e conferencia virtual “Un Nuevo Amanecer” kende tabata encarga cu e parti di introduccion. Mientras cu Economista y Periodista y director di emisora La FM, Juan Carlos Velez tabata e moderador di e forum cu a conta cu e siguiente panelista: Director di benta di Copa Airline, Chistopher Didier; directora di departamento di Asunto Economico di Aruba, Maria Dijkhoff-Pita; CCO di Avianca Holding, Silvia Mosquera y Romella Tjin Asjoe-Croes CEO di ATA

Dabian a laga sa cu pa nos industria turistico e mercado Latino Americano ta masha importante. E ta un mercado cu Aruba ta bin trahando pa mas cu 40 aña, caminda nos a inverti esfuerso y dedicacion. Ademas ATA a logra establece relacion cu nan socionan entre nan tour operation, aerolinea, agencia di biahe y prensa turistico.

El a trece un mensahe positivo. El a bisa: “Pensa riba futuro y ser positivo y mehora nos industria di biahe y turismo ta loke un manece nobo ta nifica pa nos.” Esaki ta loke ATA a transmiti durante e di 30 edicion di CATA 2020.

Directora di ATA

Directora di ATA, Ronella Tjin Asjoe-Croes a referi cu nos industria turistico ta representa un 74% di nos GDP. Un 84% di nos mercado laboral tin di haber directo of indirectamente cu e sector di turismo. “Nos ta e di dos pais mas dependiente di turismo den henter mundo,” el a bisa.

Tjin Asjoe-Croes a referi na e proyeccion di bishitantenan pa 2020/2021 a base di un escenario gradual di recuperacion. ATA su obhetivo pa 2021 ta esun di recupera e yegada di bishitantenan entre 45% y 60%. Tambe recupera e credito di turismo entre 45% y 60%. Nan ta proyecta un caida di e tarifa diario promedio cu un 28%. Igualmente recupera nos turistanan crucero entre un 45% y 67%.

El a bisa cu e escenario gradual di recuperacion ta wordo enfoca riba e reapertura “optimista” di nos turismo cu a cuminsa na juli 2020, caminda a registra un caida di un 60% pa henter aña aki. Mientras cu e escenario di recuperacion conservador aki ta uno mas gradual.

Un otro escenario menos optimista teniendo como inicio luna di juli 2020 ta mustra cu e recuperacion di e mercado lo inicia na luna di januari 2021. Te dia 31 di augustus ultimo Aruba a ricibi 259.093 turista. E prome luna (juli) cu Aruba a bin cu e reapertura di su frontera un total di 12.921 bishitantenan a bin for di Europa, Caribe y Merca. Na luna di augustus nos a ricibi un total di 17.420 turista.

El a presenta tres escenario relaciona cu e proyeccion pa 2021: 1. cautelosamente optimista 2. optimista 3. conservador. Den esun optimista ATA ta proyecta un caida di un 41%. Pa esun cautelosamente optimista un caida di un 45%. Y pa esun conservador un caida di un 55%. E cifranan aki ta wordo compara cu 2019 cu tabata un aña exitoso pa Aruba su turismo. El a referi riba algun ahuste riba nan strategia, teniendo na cuenta e realidad nobo cu nos ta pasando aden debi na e pandemia.

Entre nan, ATA a cambia nan strategia di buskeda di volumen y balor pa uno di sostenibilidad cu ta mantene un ekilibrio entre seguridad y desaroyo economico di Aruba. Tjin Asjoe-Croes a bisa cu nan ta sigui sensibilisa riba turismo sostenibel. Aworaki debi na e situacion actual, nan ta poniendo mas atencion riba salud, salubridad y higiena.

El a manda un mensahe cu na Aruba e bishitantenan lo encontra e mesun isla feliz y e mesun hende amabel. Pero si nos a bin cu normanan nobo y procedura nobo pa biba den e asina yama normalidad nobo pa garantisa un estadia di vakantie cu total seguridad y trankilidad den e isla feliz.

CMO di ATA

Chief Marketing Officer (CMO) di ATA, Sanju Luidens-Daryanani a bisa cu durante e lunanan di lock down, Aruba a enfoca y reforsa pa mehora nos producto pa medio di educacion di nos poblacion pa medio di curso on line di turismo. Tambe nan a bin cu protocol nobo di salud y seguridad pa medio di Aruba Health and Happiness Code pa ofrece un destino ainda mas safe. Tambe a wordo acelera proyecto di embeyecemento di e destino turistico Aruba, entre nan remodelacion y mehora den diferente hotel.

Ademas e sector di restaurant adapta su mes na e normanan nobo pa medio di medidanan y protocol di seguridad. Pa asina pa medio e reapertura gradual di nos frontera nos a cuminsa cu e normalidad nobo na Aruba cu normanan y protocol alinea cu e recomendacion di Organisacion Mundial di Salud (WHO) y autoridadnan di salubridad publico local (DVG).

El a bisa cu te aworaki nan por a comproba cu pa medio di un control exitoso y eficaz via di test haci na e turistanan cu ta bishita nos, y cu tur protocol introduci, ‘nos bishitante por disfruta di un vakantie relax na Aruba,’ segun Luidens-Daryanani.

General Manager di Hyatt Hotel, Gabriel Castrillon kende a representa AHATA a referi cu nos turismo ta conta cu guia di WHO y DVG pa bin cu miho practica den e sector hotelero. Nan a eleva e protocol di limpiesa existente bao norma nobo pa tur area. “E hotelnan di Aruba a compromete plenamente cu e era nobo di hospitalidad cu ta haci enfasis riba standard halto di desinfeccion y sanidad pa protege tur e bishitanan,” el a bisa.

Mientras cu CEO di Triple A (Aeropuerto), Joost Meijs a referi na e medidanan y protocol introduci di bioseguridad pa e biaheronan cu ta bin Aruba. Triple A kier haci di e biahenan pa Aruba un experiencia safe.

 

LEAVE A REPLY

Please enter your comment!
Please enter your name here