Esaki ta un momento hopi dificil, den cual grupo di turismo ta esun cu mas a wordo afecta, pero tambe e area di comercio, cu pa via di incertidumbre tin cu plania kico lo haci na futuro si e situacion lo por empeora.

Asina a duna di conoce Francis Saladin, ken ta miembro di organisacion Comerciantenan Uni, durante un entrevista cu Bon Dia Aruba el a bisa cu tin otro negoshinan of companianan cu ta sobrevivi un tiki mas facil cu otro, y esun cu no tin ayudo di gobierno, por ehemplo cu tin loonsubsidie, tin un crisis economico mas grandi y un crisis social mas grandi

Tocante medidanan di prevencion cu Gobierno di Aruba a implementa pa baha e casonan di Covid-19, por ehemplo lockdown – cual prome minister Evelyn Wever-Croes a bisa cu ta ultimo recurso cu por acudi – Saladin a menciona cu pa loke ta trata Comerciantenan Uni, siman pasa nan a haci un votacion pa puntra nan miembronan kico nan mes ta pensa si mester haci un otro lockdown. Y loke nan ta pensa di e medida aki ta cu no ta bon pa bin cu esey.

Saladin a bisa cu e motibonan di esaki ta cu e miembronan ta pensa cu gobierno mester por sa di maneha e situacion miho. “Nos sa na unda e problema di brote ta y mester ataca esey mas directo.” Tin comerciantenan cu ta cumpli cu reglanan na unda e infeccion na nan establecimentonan no ta tumando luga, como tambe tin otro comerciantenan cu no tin control of no tin disciplina.

El a duna como ehemplo e comportamento di ciudadanonan, cu algun di nan ta responsabel y otronan cu ta iresponsabel. E parti mas lamentabel ta esunnan cu ta funciona responsablemente y cu ta cumpli cu tur regla imponi; pero nan ta wordo castiga pa via di esunnan cu no ta cumpli, mester midi riba e echo cu esunnan cu no ta cumpli ta esun cu mester haya consecuencianan. “Esaki no ta un scol militar, si tin hendenan cu ta cumpli pakico mester castiga tur hende?” Saladin a expresa.

Ademas, a laga di conoce cu teniendo na cuenta cu esaki ta un tarea dificil pa gobierno mirando e aumento di casonan di Covid-19, na e momentonan aki cu pais ta pasando pa un momento di ‘tension’ pa via di decision cu gobierno mester tuma cu Hulanda, Saladin a menciona cu su persona como comerciante no tin confiansa den economia aworaki.

“Tur comerciante ta bezig ta preparando pa e pio escenario, pasobra door cu tin tanto incertidumbre y gobierno no ta papia duidelijk, ta hunga politica y tilda si ta pro of contra y nada ta wordo splica cu base mas amplio di informacion”, Saladin a manifesta.

Den mesun linea, el a declara cu ora tin un gobierno cu no ta informa debidamente, ta haya cu personanan tuma nan decisionnan cu lo cual nan ta wak of nan ta tende pero esey no ta suficiente pa tuma decisionnan bon, “loke ta causa cu nos mester cuminsa prepara pa e pio di e casonan, plania con bo ta bay mitiga e riesgonan cu ta bay bin,” di esaki el a destaca cu personal ta e gasto mas grandi cu compania por tin y eynan ta e prome golpi cu ta bay.

Considerando e afirmacion ey, el a bisa cu esey ta e reto mas grandi cu comercio ta pasando aden na e momentonan aki, pa motibo cu e mes a señala cu na dado momento e personanan tin cu cuminsa planea si e situacion ta empeora, aunke por tin loonsubsidie tambe tin e gastonan cu tin rond di dje, ademas cu comerciantenan no tin idea di kico gobierno ta bay haci.

Luna di september ta di seis luna cu e situacion aki ta bayendo y tur reserva cu tin na dado momento tin cu inverti, pa via cu por tin mashinnan cu ta daña, ekiponan, mantenemento, cosnan cu segun Saladin no por keda sin haci, ta gastonan cu no por stop y hendenan ta lubida riba esey.

Di loke ta trata aña 2021, cu gobierno mes a sigura cu poder di compra di ciudadano lo por bay atras, Saladin a afirma cu ta bay ta un aña hopi dificil, tin hendenan cu no tin disciplina di haci su placa rindi y spaar, “tur hende ta biba riba fiansa, cu placa net net, no ta un situacion facil pasobra nan tin nan gastonan pero nos ta den un cultura custuma pa malgasta y esey ta bay tin consecuencianan”, el a declara.

Mirando cu banconan a duna alivio via di e crisis lo yega na un ora cu na aña 2021 e hende lo no tin pa cuminsa paga nan cas of prestamo y esey por bira hasta mas duro y economicamente nos ta bay sintie mas fuerte pa loke ta aspecto di comercio.

Pa finalisa, Saladin a trece dilanti cu tur hende mester ta responsabel den circunstancianan aki y midi bon con ta gasta nan placa, tambe pa wak con ta comporta nan mes pa cu e isla por sali for di e ‘crisis di contagio’ tene bou control y di e manera ey por atrae e turismo back pa motibo cu esey ta bay ta e unico salbacion.

Potret di archivo.

LEAVE A REPLY

Please enter your comment!
Please enter your name here