ATA: Mester comunica riba ESTA adelanta

Oficina di Turismo di Aruba (ATA) no ta mira cu introduccion di ESTA (Electronic System for Travel Authorization) lo por afecta e fluho di turista pa nos isla. Sinembargo mester comunica esaki adelanta debidamente.   

Aunke ESTA no ta un visa e ta un instrumento pa haci un pre-screning riba e ciudadanonan cu lo bin di otro paisnan pa bishita Aruba. Minister Arthur Dowers di Husticia a laga sa cu eventualmente ESTA lo keda introduci den e prome semester aki pa tur ciudadano cu excepcion cu e ciudadanonan Hulandes como un forma preventivo contra criminalidad y ilegalidad.

Directora di ATA, Ronella Tjin-Asjoe-Croes  a bisa cu ta precisamente ATA cu cooperacion estrecho cu departamento di Inmigracion y demas instancia concerni  a cuminsa e trayecto di digitalisa e parti di formulario di inmigracion cu mester wordo yena pa ley ora cu un persona ta  drenta Aruba via nos terminal aereo. Ademas di otro medidanan cu tur hende mester cumpli cu ne ora cu nan ta drenta pa medio di nos puertonan.

Segun Tjin-Asjoe-Croes  ta haya cu e hendenan mas y mas ta custumbra cu diferente medidanan y lo tin comprension pa cu esaki. Como ATA nan ta bisa cu si e mester wordo bon comunica cu adelanto debido. E mester ta un tempo prudente pa asina tur nos socionan cu ta bende Aruba ta bon na altura cu ESTA a keda introduci.  Igualmente ATA mester haya e tempo necesario pa comunica su introduccion debidamente pa contribui den e exito total di e proyecto.

El a bisa cu na luna di december 2015 a keda lansa e proyecto di carchi di inmigracion digital. “Sigur nos ta duna nos aporte na iniciativanan cu ta permiti pa e maneho di ingreso di bishitantenan ta mas stricto”. Directora di ATA a agrega cu e organismo aki tambe ta kere cu e tipo di iniciativa aki mester wordo maneha di un manera kisas mas  prudente .

E tipo di instrumento aki –segun directora di ATA- ta brinda e posibilidad cu e bishitante ta wordo registra como turista prome cu e ta yega Aruba caba. “Esaki sigur tin su adelanto pa ATA como esun cu ta buscando informacion turistico, e tin bentaha”, el a bisa.

ATA ta compronde cu un aspecto hopi importante di ESTA ta siguridad. P’esey  nan ta haya e importancia di departamentonan concerni por tin informacion y por screening esun cu ta bin adelanta. Nan ta kere cu diferente mercado di nos producto turistico di awendia ta exigi un comunicacion debido. Ya cu siguridad y mantencion di un instrumento manera ESTA ta algo importante.