Tur aña desde 2008, mundialmente e asina yama ‘Earth Hour’ ta tuma luga durante luna di maart. Aruba Tourism Authority (ATA) tambe lo participa na e evento aki mañan.

Segun e comunicado di ATA, e ta un evenemento pa conscientisa e hecho cu nos mundo ta pasando den cambionan di clima.

Pa tal motibo, mañan, diasabra, di 8:30 pa 9:30 di anochi (ora local) den mas cu 160 pais mundialmente ta wordo pidi pa paga e luznan no esencial pa un ora largo. Individuonan, negoshinan, comercio en general, tur ta wordo en curasha pa aporta na esaki.

ATA ta consciente di e cambionan di clima, nan ta splica. Di e forma aki nan ta participa na e tremendo accion ambiental Earth Hour pa paga tur luz no esencial na nan edificio como tambe paden e edificio cu normalmente ta keda cendi anochi. ATA ta apoya iniciativanan sostenibel pa nos futuro generacion y un Aruba duradero.

E origen di Earth Hour a inicia na Sydney – Australia na aña 2007. Siguiente aña el a haya un reconocimento mundialmente y desde e tempo ey, Aruba tambe ta participa. Tambe tin un comision, Earth Hour Aruba Community Group (EHACG) pa conscientisa e comunidad Arubano pa cu e importancia riba sostenibilidad di energia.

E meta en general di Earth Hour ta pa conscientisa tur hende cu e lucha pa un mundo sostenibel, e comunicado ta clausura.