Ban ta obhetivo cu cifra

Nos ta acepta e reto

Den nos edicion di ayera e parlamentario y posibel proximo lider di e partido opositor a lansa un bon idea, cu nos ta apoya di curason: Ban ta obhetivo den e discusion tocante nos financia publico. E tin gran rason y nos ta acepta e reto aki. Si finalmente e ta bay ta di acuerdo cu loke nos ta topa, lo ta otro cos.

E debate grandi, cu tin ora tin hende cansa caba, ta cu di unda e deficit grandi na fin di 2017 a sali: ta e gobierno anterior a bay laga e asunto asina, o ta e gabinete entrante, cu nan supuesto fama di ‘campeon di medida’ a core crea e deficit pa nan por haci loke mas nan ta encanta: tuma medida! Den esaki nos tin un arbitro cu pa nos ta aceptabel sin mas: CAft. Nos ta kere cu pa oposicion actual nan ta aceptabel tambe; al fin y al cabo e representante di Aruba pa nan mester ta di onbesproken gedrag pasobra e ta sali di e cuna berde, y ademas nunca nos tabatin comentario riba su actuacion, pakico awor anto. E otronan cu realmente ta hiba e batuta, tambe a mustra un benevolencia cu e gabinete anterior, cu ta haci cu dificilmente nan ta califica como – actualmente – pro-gobierno y anti-oposicion. Laga nos tira un bista riba kico nan a produci aña pasa pa nos. Otro punto fuerte pa mantene obhetividad ta cu, manera e apreciabel lider opositor tambe ta afirma, e cifranan ta produci pa e profesionalnan di Financia, di cual nos no tin nada di keha, al contrario. Riba esey nos ta di acuerdo anto.

Den e prome rapport, di kwartaal 1-2017, CAft ta constata cu e deficit di gobierno ta 1,5%, y pa motibo di un resultado positivo di e sector colectivo ta yega na un deficit total di 1,1%. Aki caba e colegio ta manda un prome mensahe di preocupacion, bisando cu e cifra menciona ta ‘considerablemente mas halto cu e norma pa e deficit pa henter aña di 0,5%. Na mita di aña esaki ta ripiti; CAft ta constata a base di e cifranan entrega pa gobierno anterior cu e deficit di gobierno so ta 1,6%, y esun colectivo ta 0,7%. Nan ta indica cu principalmente e loonbelasting y BBO ta core atras compara cu e pronosticonan di presupuesto y ta yama esakinan riesgo pa na fin di aña por cumpli cu e norma di 0,5%.

Ta yega na rapport number 3, e situacion te cu fin di september. Aki ta constata cu e deficit a bay te 3,3% pa gobierno, y 2,6% pa sector colectivo. Aunke e carta di CAft ta dirigi na e actual minister encarga cu Financia, ta e tabata responsabel? No, toch? Apenas mita di november 2017 e rapport aki a bay pa CAft pa nan comentario, y ta logico cu nan ta dirigi palabra na esun cu tey. Finalmente, ta bin e aña aki, e cuenta final di 2017: deficit gubernamental 3,1%, y colectivamente 2,8%. Nos no ta bon den cifra, pero nos sa sigur cu esaki no ta e 0,5% di cual e ley ta papia. Y por fabor no bin cu e storia cu ‘nos no sa kico nan a haci entre 18 di november y 31 di december’.

Pa ilustra un poco mas, nos ta bay na e comentario riba e di tres rapport: “Pa reduci e deficit di 3,3% bbp te na e deficit financiero acorda den e ley (LAft) di 0,5%, pais Aruba lo mester mustra den e di cuatro kwartaal un surplus financiero di 2,8% (AWG 138 miyon). E entradanan anticipa ainda, cu ta ser menciona den e di tres rapport, entre otro e winstbelasting posterga (di dos periodo di pago 30 di november), e settlement sum di Valero y e benta di Fuels Marketing & Supply Aruba (FMSA), sin embargo no ta suficiente pa realisa un surplus financiero di tal indole. Por lo tanto CAft ta di opinion cu for di e tercer rapport no ta resulta suficientemente probabel cu e deficit preliminar di 2,6% den e ultimo kwartaal lo ser reduci te e deficit financiero maximal di 0,5% bbp na 2017. “(traduccion di Bon Dia Aruba)

Pa nos comprende bon: hasta si e sumanan grandi di e settlement cu Valero y di e benta di e compania FMSA lo a drenta, gobierno – cualkier cu tabata den e driver’s seat – lo no a yega na e deficit chikito poni den e ley. Nos a mira e placa ey drenta? Riba esey, e otro parti di e storia fabuloso tocante e refineria a percura pa diferente impuesto no yega na loke tabatin presupuesta, manera CAft ta comenta tambe. Esey ta henter e storia y ta di spera cu e splicacion aki ta suficiente pa nos por cera e capitulo di 2017.

Y pa un bon motibo, pasobra loke realmente ta preocupa nos ta e situacion actual y con Aruba mester bay yega riba tereno sigur atrobe. Como medio di comunicacion, nos no ta yuda ningun gobierno cu kere den cifranan no real. Lo nos ta gañando nos mes y pa colmo, yuda gaña otro hende. Esey no ta e desafio.

You May Also Like

AVP ta reconoce crisis?

E partido den gobierno actualmente tin un vocero nobo pa asunto financiero. E anterior ...

editorial 2_15_1.jpg

Hopi cos di drecha den sector medico: Pero hopi di nan ta manehabel…

E demostracion contra situacion den sector medico siman pasa sigur no a impresiona pa ...

Decision a cay: Marisol cu POR

E tan espera decision a cay. Marisol Tromp ta uni forsa cu e partido ...

editorial 2_15_1.jpg

Metodo ‘democratico’ nobo?

Gobierno ta anuncia dos candidato pa Ministro Plenipotenciario   Nos no sa ta ki ...

Mester acuerdo di traspaso di gobierno?

Traspaso di gobierno no a bay manera e mester bay. Di ambos banda nos ...

WEB riba gas na luga di fuel oil? Pakico si…

Segun informacion reciente, e huma di WEB, cu ta kima heavy fuel oil (HFO) ...