Simulacro AAA (4).jpg
– Dia 8 di november Aruba Airport a facilita un asina yama Full Scale Emergency Exercise (FSEE) (simularco) na Aeropuerto Internacional Reina Beatrix.
 
E simularco a wordo organisa dor di Oficina di Maneho di Crisis (Bureau Rampenbestrijding) en cooperacion estrecho cu Aruba Airport Authority, Cuerpo di Bombero, Cuerpo di Polis, Imsan Departamento di Salubridad Publico, Departamento di Asuntonan Social, Marina Hulandes y aerolinea Southwest .
Aruba Airport ta rekeri pa tene un simularco di tal indole cada 2 aña pa asina cumpli cu standard di ICAO, y pa asina keda cumpli cu e terminonan di e Certificacion di Operacion di Aeropuerto.
E simularco tawata consisti di un situacion di emergencia completo (full emergency), un aterisahe unda e avion a accidenta y e prome reaccion dor di tur instancia concerni, incluyendo e implementacion di e Plan di e Aerolinea di Asistencia pa Famia den coordinacion cu Departamento di Asuntonan Social y  Cruz Cora .
E simularco a wordo planea y ehecuta durante oranan di madruga pa asina  evita cualkier inconveniencia pa cu operacion di airport y aerolineanan. CEO di Aruba Airport, Sr James Fazio a expresa su gratitud na tur esnan envolvi den e preparacionnan y ehecucion di e simularco di e aña aki y a felicita e Oficina di Maneho di Crisis  cu un excelente trabou.
Durante e simannan binidero tur esnan envolvi den e simularco di e aña aki lo evalua e procedura y protocolnan di e simularco, y unda ta necesario, incorpora e recomendacionnan den nan plannan respective  di reaccion.