Minister Presidente Mike Eman a bisa cu e desaroyo politico cu a tuma luga recientemente cu e renuncia di sr. Otmar Oduber como minister, no tin nada di haber directamente cu e cambionan cu a wordo introduci pa flexibilisa e tarifa y orario di Aruparking.
“E desaroyo politico cu a tuma luga recientemente por crea e impresion cu gobierno of prome Minister of otro ministernan no tabata di acuerdo cu minister Oduber ariba Aruparking.”. E prome mandatario ta bisa cu absolutamente esaki no ta e caso. Pero e ta haya cu cualkier flexibilisacion di e sistema aki mester abstrae for di cualkier desaroyo politico reciente cu tabatin.
Idea di parkeer for di comerciantenan
E ta sigui cu e idea aki pa paga pa parkeer no a bin di gobierno, sino di e mesun sector comercial di e area aki tempo di Mambo. Nan pa añanan largo a expresa cu e sitionan unda e clientenan por yega pa staciona nan auto tabata wordo ocupa door di empleadonan. Ta nan a propone pa paga pa parkeer pa percura cu tin espacio pa nan clientenan por yega. Ta asina cu e proyecto aki a bira un propiedad pa gobierno y el a wordo ehecuta pa ex minister Otmar Oduber, segun premier Eman.
E ta haya cu ora algo ta wordo introduci como e sistema di e meter parkeer mester ta responsabel pa bin cu ahustacion den caso cu e no ta traha manera a wordo pensa cu e lo traha antes di bin cu ne.
Di e forma aki nan por bin cu un reevaluacion pero den e parti aki e tabatin un diferencia di opinion cu ex minister Oduber. Ya cu –segun premier Eman e tabata desea cu e ahustacion aki por a sosode un tiki mas prome. Pero e ta reconoce cu e minister Oduber tabatin su responsabilidad y e tabata mira e cifranan financiero prome. Den su caso e ta topa tur siman cu e doñonan di e negoshinan cu ta expresa nan disgusto cu e sistema di paga pa parkeer ya cu nan ta mira cu esaki ta afecta nan benta.
Tiendanan mester haci su parti
E ta spera cu e flexibilidad cu a keda introduci entrante otro siman lo trece un ambiente mas positivo pa e otro partner haci su parti ya cu gobierno a haci su parti tambe. E negoshinan estableci den centro di ciudad tabata kier wifi free, sound system, renobacion centro di ciudad, iluminacion, y tur a cumpli. “Awor kico e tiendanan tambe lo por haci pasobra gobierno a haci su parti.”
Premier Eman ta sinti cu a bin un obsesion cu ta e meter parkeer cu a afecta e benta den centro di ciudad, pero te aworaki e mandatario no tin niun garantia cu ta e sistema di paga pa parkeer ta e problema. Pero sinembargo e ta sinti un responsabilidad pa purba y mira si e meter parkeer ta un di e problema cu ta afecta e comerciantenan di e area aki. “Si nos por soluciona asina, e prijs cu nos lo paga pa e logro cu nos lo tin definitely nos ta dispuesto pa hacie.”
El a saca su som caminda el a indica cu gobierno a inverti 150 miyon florin y di otro banda ta wordo papia di 100 of 200 mil florin extra den inversion pa flexibilisa e orario inicial di 7am pa 7pm pa esun di 9am pa 3pm. “ E sumanan envolvi den inversion cu nos a haci y di locual e tiendanan ta perde, ta mucho mas grandi cu e decision su impacto.”
E ta kere cu tambe nan por reduci e efecto di reduccion di entrada pa Arubus pa medio di bin cu otro actividad pa genera entrada. Nan lo reuni cu e diferente partnernan pa evalua esaki.
