ATIA kier sa posicion di candidatonan den eleccion venidero

E organisacion cu ta representa parti di e sector comercial na Aruba, ATIA, kier sa e posicion di participantenan den eleccion venidero riba asunto di economia.

Como cu e aña aki cu ta uno di eleccion general na Aruba,  presidente di ATIA Ronald van Trigt ta bisa cu e gremio aki su posicion principal semper ta esun di ta un bos di comercio. “Kiermen nos mester informa.”  Specificamente riba nos economia, pero tambe riba otro puntonan  manera e mercado laboral cu pa ATIA ta importante.

Puntonan
Tambe riba cierto desaroyonan den leynan ATIA kier sa kico nan ta pensa di con efectivo nan ta y nan bista riba e implementacion. E presidente ta referi na leynan manera “ketenaansprakelijkheid”, caminda tur comerciante ta responsabel tambe pa su sub contratistanan. Un punto tin di haber cu e posicion di belasting, ya cu ATIA kier sa kico ta e vision di e partidonan participante ta riba e tereno fiscal.  Kico nan kier propone y kico nan incentivonan lo ta pa cu comercio. Sr. Van Trigt ta mira e aspectonan aki como esun di interes den e temporada di campaña.

Sostenibilidad
ATIA ta añadi e punto tambe di sostenibilidad. El a bisa cu na aña 2016 recientemente Aruba Bank a organisa un forum tocante e topico aki pa cu nos isla. “Kiermen nos no por los mas sostenibilidad. Kico nos lo bay haci cu nos isla y con nos ta bay ta aki 10 aña.” E ta agrega cu como gremio nan ta consulta hopi riba crecemento y riba GDP,  pero e ta haya cu tin otro factornan cu ta importante, entre nan salud, educacion, etc.. Recientemente nan ta wak cu gobierno a confirma e sosten di Nacionnan Uni pa Aruba como un pais sostenibel. ATIA ta aplaudi esey, pero nan kier wak tambe con nan ta wordo implementa. Como gremio nan ta kere cu un pais cu nan tin cu  inverti den dje, mester ta un pais bon pa biba den dje tambe.

Vigila
Tambe e presidente ta indica cu ATIA no solamente ta un bos cu ta informa, pero cu ta vigila kico ta sosode den comercio. Durante 2017 e gremio aki ta bay sigui haci esaki. Tin biaha esaki por varia, ya sea riba posicion di otro gremio of di gobierno, pero nan ta kere cu nan opinion ta uno cu nan ta vocifera na beneficio semper di comunidad den un forma positivo.
“Nos ta purba y nos ta bay keda di haci esey. No solamente di purba di trece un critica pero tambe bin cu su solucion.” Ya cu ta facil pa critica pero ta mas importante pa contribui pa logra cierto metanan, segun e. Sr. Van Trigt ta bisa cu unda ATIA lo por sostene y traha, nan lo bay t’ey. Te hasta tin biaha den cosnan chikito cu ta pasando, ATIA lo tin un rol cu ta bay hunga y nan ta bay purba di ta presente durante 2017. Presidente di ATIA ta considera importante cu nan a logra haya un directora nobo, Michelle de Groot, y pa medio di dje nan bos lo ta mas frecuente y mas consistente. E ta spera cu pa e aña aki cu a caba di habri ATIA como gremio lo por sigui informa, ya cu e ta un aña electoral. “Kiermen un aña unda cu hopi cos lo wordo treci dilanti for di varios partido”. Locual ATIA kier si ta cu nos mester tene tur hende honesto y tur hende mester papia locual ta realidad, ya cu nos debe comercio esey, y nos debe e pueblo esey. Specialmente riba cosnan cu mester ta realisabel y cu ta cumbini economia di Aruba , pero tambe Aruba en general, segun sr. Van Trigt.