Atia (NW).JPG
– Aruba Trade and Industry Association (ATIA) anualmente ta organisa nan “Annual Corporate Event” y e aña aki no ta excepcion. E aña aki ATIA lo ta celebrando e di 7 edicion cu un tremendo evento invitando tur miembro como tambe henter comunidad di Aruba.
 
Durante e conferencia di prensa, directora di ATIA, Michelle de Groot a anuncia Sr. Alirio Zambrano, Project Director di CITGO Aruba Refinery, y Sr. Alvin Koolman, Director di Refineria di Aruba, como e oradornan invita. E evento aki lo tuma luga dia 2 di december proximo na Marriott Ballroom cuminsando 7’or di anochi.
 
E tema principal di e anochi lo ta “e reapertura di e Refineria” unda cu Sr. Alirio
Zambrano como tambe Sr. Alvin Koolman, lo elabora extensamente riba e topico
enfocando tambe ariba e impacto cu e tin pa nos economia, empleo y Aruba en
general. Despues di e parti oficial lo sigui pa un recepcion cu Tsunami.
No tin duda cu ATIA ta hunga un papel importante den nos comunidad
principalmente na momento di vocifera y proteha e interes di su miembronan y
gremio comercial di Aruba, p’esey tambe e organisacion a dicidi pa invita experto
di CITGO y Refineria di Aruba pa comparti nan conocemento y plannan cu e
comunidad di Aruba.
 
Esaki sigur ta un topico actual y importante pa comercio y Aruba en general, asina directora di ATIA a expresa durante e conferencia. ATIA ta extende un cordial invitacion na su miembronan y henter e gremio comercial pa forma parti di e “Annual Corporate Event” cu ta un iniciativa pa trece hunto e comunidad comercial di Aruba y na mes momento recauda fondo pa e asociacion. ATIA kier a gradici e patrocinador principal Caribbean Mercantile Bank N.V. como tambe Refineria di Aruba y CITGO Aruba Refinery N.V. pa haci e evento aki posibel. Pa mas informacion of reservacion di ticket por tuma contacto cu ATIA.
 
Aruba Trade and Industry Association, a wordo funda na aña 1945 cu e obhetivo
principal pa proteha e interes di e miembronan, promove un ambiente comercial
di calidad halto y un clima di inversion riba nos isla. ATIA su miembresia ta
representa directamente of indirectamente mas di 80% di empleo di e sector priva
di Aruba. ATIA ta continua cu su aportacion na defini un clima socioeconomico di
Aruba. ATIA ta situa na Pedro Gallegostraat 6, pa mas informacion tocante
miembresia yama 582-7593, bishita www.atiaruba.org of nan pagina riba
facebook: www.facebook.com/arubatrade.