Un derby di Madrid lo dicidi e campeon di Super Cup Spaño na Saudi Arabia.
Atletico Madrid a rally cu dos gol laat den e partido, pa vence Barcelona 3-2 ayera, preparando un encuentro contra rival di ciudad Real Madrid durante e final di Super Cup Spaño diadomingo.
Real Madrid a vence Valencia 3-1 den e prome semifinal na stadion King Abdullah Sports City diaranson.
Atletico y Real Madrid a yega e torneo e aña aki unicamente pasobra federacion di futbol Spaño a debuta un formato di ‘ultimo cuatro’ como parti di un acuerdo lucrativo di tres aña pa hunga na Saudi Arabia. Anteriormente, unicamente campeon di liga Spaño – Barcelona temporada ultimo – y e campeon di Copa del Rey – Valencia – tabata participa.
Barcelona tabata mas tanto den control durante e partido, pero Atletico a habri anotacion menos di 20 seconde den segundo mita cu un gol di centrocampista Jorge ‘Koke’ Resureccion, kende a drenta durante medio tempo.
Barcelona a cuminsa su comeback apenas cinco minuut despues, cu Messi empatando cu un tiro bon para despues di atravesa e dos defensa den e area. Antoine Griezman a pone su team dilanti cu un tiro di cabes den minuut 62 cu e rebound despues cu portero di Atletico, Jan Oblak a stop intento di Luis Suarez.
Barcelona a sigui hunga miho, pero Atletico a menasa cu contraatakenan y a empara cu un tiro penalty converti pa Alvaro Morata den minuut 82 despues cu delantero Victor ‘Vitolo’ Machin tabata victima di foul den un situacion uno-a-uno cu portero di Barcelona, Neto.
Atletico a logra e gol victorioso cuatro minuut despues, siguiendo un contraatake lihe, e biaha aki cu Angel Correa anotando cu un tiro cu a bounce for di portero Neto prome cu drenta.
Coach di Barcelona, Ernesto Valverde, ken lo ta bou presion enorme na cas despues di e perdida, a bisa: “Tabata un partido intenso. Tabata parce cu nos tabatin’e bou control, pero nan a logra rally.”
Sistema di revision di video VAR a descualifica dos gol di Barcelona, un di Messi pa un handball net prome cu gol di Griezmann, y otro di Pique pasobra di offside den minuut 73, ora Barcelona tabata liderando 2-1.
E prome mita a caba cu un altercado chikito entre hungadonan di ambos team, incluyendo Messi y delantero hoben di Atletico, Joao Felix.
E publico mayormente pro-Barcelona na stadion King Abdullah cu capacidad di 62mil tabata hopi mas grandi cu durante e wega di Real Madrid contra Valencia. Federacion Spaño a bisa prome cu e partido cu e tabata sold out.
