Aruba no a cumpli cu determinacion di cuentanan anual, ni a manda e reportahe di ehecucion pa di tres kwartaal di 2020 na tempo. Asina Professor dr. Raymond Gradus, presidente di Caft, a bisa den su reaccion na Prome Minister Evelyn Wever Croes. E carta di College Aruba financieel toezicht, a bay tambe pa Presidente di Parlamento mr Juan Thijsen y pa Director di Finanzas, Derrick Werleman.

CAft mester a ricibi e reportahe di ehecucion, (uitvoeringsrapportage; UR), pa di tres kwartaal di 2020,cu conforme articulo 17 inciso 1 di Landsverordening Aruba tijdelijk financieel toezicht (Laft), dentro di maximo 6 siman despues di final di cada kwartaal. Pues Minister di Finanzas Xiomara Maduro mester a entrega e UR dia 12 di November pa mas tarda, pero CAft a ricibi esaki dia 17 di november cu ta nifica cu tabatin retraso.

E crisis mundial di corona a afecta economia di Aruba grandemente, CAft ta comenta. E consecuencianan financiero-economico di e crisis riba presupuesto di Aruba a keda elabora den e presupuesto modifica, stipula pa 2020. Desde 1 di juli a habri frontera parcialmente y a nota cu economia a recupera den e di tres kwartaal mas liher cu a anticipa anteriormente. CAft a ricibi dia 24 di november e mas reciente cambio di presupuesto 2020. Lo duna un conseho separa riba e presupuesto adapta aki.

E cifranan di presupuesto ya caba ta incorpora den e ultimo reportahe, cu CAft a caba di analisa.

Dia 13 di november Aruba y Hulanda a firma e acuerdo pa condicionnan pa sosten di liquidez, incluso e landspakket. Conseho di Minister di Reino, entre otro basa riba conseho di CAft, a duna tres tranche (parti) di sosten di liquidez pa un suma total di 414 miyon florin. Esaki ta e base di e reaccion di CAft riba e di tres UR.

E LAft y e Protocol di 22 di November 2018 ta e cuadro di evaluacion pa CAft, den sentido cu Conseho di Ministro di Reino a bay di acuerdo cu un desviacion di e normanan cu mester conta pa e deficit financiero, manera e ta stipula den articulo 14 inciso 2, di LAft y e protocol concerni. CAft a conseha cuanto por desvia di e normanan aki y a manda su conseho pa Conseho di Minister di Reino. Consecuentemente, a permiti Aruba un deficit financiero maximo di 808 miyon florin pa 2020.

Como tal, Aruba mester hinca den e di dos cambio presupuestario di 2020 un splicacion amplio cu tin di haci cu e calculacion riba ‘cash basis’ di gobierno, compara cu e ‘kosten -batenanalyse’ cu CAft kier mira pa por evalua si actualisacion di e deficit ta necesario.

Opinion

E resultado preliminar den e di tres UR ta ilustra un deficit di 519 miyon florin cu ta un aumento di 250 miyon compara cu e deficit di 269 miyon cu a acumula den e di dos raportahe (di mitar di aña). Ta spera menos entrada for di e ganashinan riba erfpacht y retribucion, leges y derecho. Pa loke ta cobranza di erfpacht, CAft ta urgi pa introduci mehoracion, pa evita cu e entrada ta menos cu a spera. Pa loke ta loonsubsidie, ta anticipa cu tin menos peticion pa esaki, igual cu costo di bienes y servicio. CAft a constata si cu aunke cu a baha e gasto di personal debi cu a corta 12.5 porciento di e salarionan, cu esaki no ta resultado di un plan di maneho pa baha e gastonan di personal, esta e Beleidsplan Verlaging Personeelslasten (BVP) (Bon Dia Aruba a haci pregunta riba e BVP mirando cu esaki no a keda publica . Parlamentarionan tampoco a ricibi e BVP). Consecuentemente CAft ta pidi Aruba pa ehecuta e plan aki manera a keda palabra. Tambe CAft ta constata cu cierto asuntonan no a keda regla cu tabata exigi cambio di ley. Asina ta señala cu “eliminacion di e auomatismo di periodiek y promocion” no a duna resultado ainda, pasobra e cambionan di ley necesaro no a keda implementa. CAft ta pidi atencion urgente pa esaki. Tambe ta resulta di e BVP cu tin ainda disponibel AWG 5 miyon pa contrata personal riba puesto vacante. Tumando na cuenta e tarea di reduci gasto, CAft ta conseha pa solamente yena funcionnan clave. Den e cuadro aki ta menciona fortificacion di e funcionfinanciero, manera na Centrale Accountantsdienst, un servicio cu pa hopi aña ta lidia cu deficit serio di personal.

Nulmeting a keda atras

Aruba no a duna continuacion na e peticion di CAft, pa na momento di e di tres UR, presenta un plan pa e medicion basico (‘nulmeting’) y un plan di ehecucion di esaki, loke mester sucede ainda, pa asina por sigura cu por controla e cuentanan anual. Caft a enfatisa den su consehonan anterior cu e progreso di e nulmeting aki no ta cla y cu tin poco bista riba e trabao di e Fundacion Buro di Accountant di Gobierno (SOAB), pa asina por yega na un declaracion di control di accountant riba e aña administrativo 2020. Caft ta bolbe puntra atencion pa esaki y pa duna informacion pa mas tarda dia 1 di februari 2021, particularmente cual ta e tarea cu Aruba a duna na SOAB y su planificacion.

E ciclo di responsabilisacion no ta cana manera ta requeri. Aruba no a cumpli cu e peticion pa presenta cuentanan anual di 2016 te cu 2018 pa mas tarda dia 1 di December 2020. Caft ta urgi esaki, y tambe ta pidi pa splica a termino corto ki tempo ta presenta proyecto di cuenta anual di 2019.