Cu interes nos a tuma nota di e analisis cu e partido opositor democrata cristian a presenta, encuanto e situacion di deterioro cu ta tumando lugar bao di e parti menos afluente di nos comunidad. No cu e intencion pa participa plenamente den e debate politico encuanto esaki, pero na promer lugar pa interes di loke e cifranan treci dilanti ta bisa, y con pa interpreta nan.

Laga nos cuminza cu bisa cu e situacion den mas di mitar di nos poblacion ta bibando pa hopi aña caba den un situacion menos faborable. Ta mustra, den e analisis presenta, riba por ehemplo e diferencia creciente entre loke ta e salario minimo, y e minimo di subsistencia (bestaansminimum). Awor, tin dos manera pa interpreta e abismo cu nos ta mira ta sigui habri den ultimo añanan. Nos por bisa cu e salario minimo ta kedando atras, mirando e tendencia di nivel general di prijs di consumo. E ultimo aki ta resulta den un paquete di gasto pa un persona soltero o un pareha/famia, cu ta dificil pa cubri cu e nivel di salario minimo. Pa cuminza e salario minimo cu no lo ta creciendo suficientemente: lo ta un eror pa pensa cu por soluciona e problema simplemente aumentando e salario minimo frecuentemente, pa varios motibo. Uno ta cu aumento di salario minimo mester sigui tendencia di crecimento economico. En corto: si bo economia no por carg’e, no tin sentido aumenta, pasobra bo ta logra net lo contrario. Nos a caba di sali di un crisis global di salud, y mester mira ainda unda e actual crisis di guera na Europa ta hiba nos. Di otro banda, tin un recuperacion bastante alentador den nos propio economia. Nos no conoce ainda e conseho cu gobierno mester haya pa un eventual aumento por tuma lugar proximamente.

Sin embargo, e ‘abismo’ entre salario y minimo di subsistencia no ta depende di salario so. Tin otro factor cu por influencia poder di compra. Mester recorda cu Conseho Socio-Economico (SER) na fin di 2018 a publica nan estudio con pa atende e problema di e abismo creciente entre salario minimo y bestaansminimum, aumentando poder di compra. Nos mester keda straña cu 4 aña despues no tabatin respuesta algun riba esaki, asina leu cu nos informacion ta yega. Tambe e cambionan tecnico cu mester a bin den e ley di salario minimo, cu ta haci posible un conseho cu no ta solamente ‘0’ of ‘100’ porciento di e inflacion constata, pero algo cu ta acomoda un aumenta mas modera, mirando situacion economico, no a keda cumpli pa gobierno.

Di otro banda, cu e adaptacionnan cu a tuma lugar den ultimo añanan, nos salario minimo a sobrepasa e nivel di US$ 1.000, loke ta haci nos un di e paisnan cu nivel mas halto di salario minimo. Esey no por ta motibo pa ten’e mas abao cu mester, pasobra ta ‘aki bo ta biba, aki bo ta gasta’. Y nos nivel di prijs ta sumamente halto tambe, loke ta hustifica e salario minimo halto tambe. Algun problema? Si, esaki ta haci nos un di e destinonan mas caro den e region, den e sector economico cu cada pais ta aden, turismo. No cu nos ta bisa cu mester keda sin aumenta si no por otro, pero mester ta posible pa haci algo cu otro factor. Por ehemplo, mehora transporte publico drasticamente, eliminando e necesidad pa un persona tin un auto, pasobra si no, e no ta ni yega trabao…

Pero tin mas aspecto pa tuma na cuenta. Tin un grupo grandi, mas cu mitar bao di 2500 florin pa luna, un hecho conoci. Pero esey no ta bisa tur cos: Nam so ta traha? Cu cuanto persona nan ta biba y cuanto nan tin hunto? Nos sa di cifra di Censo 2020 cu tin un grupo bastante grandi di mayor, cu ta soltero(a) cu yiu. Loke mester analiza ainda, ta e comparacion di estado civil y forma di hogar, compara cu entrada (salario). Pa un discusion sano, ta necesario pa por deduci si un persona cu tin salario minimo, ta forma hogar cu otro persona den mesun categoria di salario, o mas halto. Esaki lo defini si conhuntamente nan ta yega na un entrada cu ta pone nan riba e nivel di subsistencia. Nos ta bolbe riba e tema aki.

Sin embargo, esaki no ta kita e realidadconoci di e insuficiencia di entrada di un bon parti di e poblacion, sea soltero o den famia. Awor, un persona por bisa: “Esaki no ta nada straño, nos a caba di pasa den dos crisis, kico otro bo a spera?”. Esey ta berdad, pero mester di algun detaye. Nos por mira den e cifranan presenta pa e partido, cu e aumento grandi di e abismo no tabata durante e crisis na 2020, ni na 2021. Esey tabata debi na e aumento di salario minimo na 2019 y 2020, cu tabatin nan efecto (relativo) positivo riba e bestaansminimum. E golpi grandi a bin e aña aki, unda e crisis mundial causa pa e guera na Ucrania a ocasiona un aumento drastico di prijs di tur categoria, pero sigur di alimento y combustible. Riba esey ta wardando ainda contesta di gobierno, pa anuncia e cambio pa 1 di januari 2023. Y…, e cambionan mas structural pa ‘boost’ poder di compra? Por ta cu mientras tanto SER a haya audiencia cerca e mandatario encarga, pa discuti nan rapport di 4 aña pasa…

LEAVE A REPLY

Please enter your comment!
Please enter your name here