Aumento BBO di 1% a haci impacto; Na 2023 por spera alrededor di 100 miyon florin mas

Entrante 1 di januari 2023 e promer medida pa aumenta entrada via cambio den cobro di BBO/BAVP/BAVP a bira realidad, unda e porcentahe total a bay di 6% pa 7%. Esaki pendiente e introduccion di BBO di 7% na frontera, loke lo percura pa mas entrada ainda.

Cifranan di Banco Central (Boletinnan Mensual) ta mustra cu den promer cuatro luna di 2023 gobierno a mira un total di Afl. 106,5 miyon drenta na BBO/BAVP. Den e mesun lunanan aki na 2022 a drenta Afl. 71,8 miyon, un aumento di Afl. 24,7 miyon (34,4%). Si e tendencia aki continua, aña 2023 lo cera cu casi Afl. 100 miyon mas na BBO/BAVP. Na 2022 e total di BBO/BAVP tabata Afl. 222,5 miyon, y na 2023 por yega na Afl. 319,5 miyon, cu e tendencia actual.

E aumento di BBO/BAVP no ta debi solamente na e adicion di e 1% extra. Economia ta desaroyando positivamente, locual por deduci tambe di e aumento di 23,7% di impuesto di importacion den mesun periodo. Cu cierto cautela por bisa cu e porcentahe halto di incremento di BBO/BAVP ta consisti di ambos componente. Mester tuma na cuenta aki cu e aumento di 1% den cierto caso ta stimula acumulacion di BBO riba BBO, den e casonan di rebenta promer cu e producto yega na e consumidor final. Pasa di 6% riba 6%, pa 7% riba 7% ta causa un aumento extra di prijs pasobra ta paga BBO dos biaha den forma acumula, pasobra no tin restitucion di BBO paga.

Proyeccion multi-anual di impuesto indirecto

Segun e presupuesto multi-anual presenta den presupuesto 2023, e aña aki lo drenta Afl. 715 miyon na impuesto indirecto, loke ta un aumento fuerte compara cu 2022, unda segun reportahe gubernamental a yega na un total di Afl. 605 miyon na impuesto indirecto.

Si combina e aumento di BBO/BAVP cu e aumento constata den impuesto di importacion, casi Afl. 40 miyon a base di proyeccion riba resto di aña di e cifranan di e prome cuatro lunanan, ya gobierno ta yegando na e suma previsto den e presupuesto multi-anual. Esaki sin tuma na cuenta eventual aumento di entrada di e otro tiponan di impuesto indirecto cu tambe ta sinti e efecto positivo di e crecmento economico.

E pregunta cu ta surgi ta si realmente gobierno mester un BBO na frontera cu urgencia, ya cu e cifranan di januari te april ta mustra cu ya ta yegando na e meta di aumento di impuesto indirecto pa 2023. E BBO na frontera lo a trece aden como Afl. 40 miyon extra, si e fecha di introduccion no lo a cambia. E proximo fecha factible lo ta 1 di augustus, si parlamento trata e proyecto di ley durante luna di juli, den tempo di reces. Mas probable anto ta bira 1 di september.