ORANJESTAD – Memey di un situacion dificil, un cantidad di problema laboral creciente, sindicato SEPPA ta aplaudi e intencionnan di minister di labor, Glenbert Croes pa trece cambionan den e diferente area of leynan cu ta perhudica e trahadonan. Netamente na ocasion di 100 aña di Organisacion Internacional di Labor (ILO), SEPPA ta mira e intencionnan cu hopi positivismo.
Pa SEPPA, e cambio di e dia di trabao di 8 ora pa 9 ora mester ta den discusion. Igualmente e asunto di uitzendbureau, cu ta cuadra igualmente den e lucha di paisnan miembro di ILO pa trece cambio den loke ta nan propio constatacion di e ‘creciente trabao precario’, unda trahadonan ta sin derecho drechi. Tambe e problemanan di insiguridad na pia di trabao, enseñansa den su totalidad, maneho di salario, tratadonan cu mester keda ratifica, situacion social na pais Aruba, ta e.o. temanan cu mester bin como prioridad.
E cambio di un dia di trabao di 8 ora pa 9 ora, ta bay linea recta contra e lucha di 133 aña pasa, un kiebro den e lucha sagrado di un dia di trabao di 8 ora! Dia 1 di mei awor, nos ta yega e 133 aña di e lucha di e martirnan di Chicago, na unda lidernan sindical a ofrece nan bida pa conkista derecho di trabao di 8 ora, demostrando forsa y grandeza.
Segun SEPPA, loke ta pasando na e momentonan aki, cu trahado den trabao di 9 ora ta di tristeza total. Den algun ocasion ni ta respeta e derecho pa tin un mey ora liber di pausa. E trahado ta den un situacion penoso, mas ausencia di cas, menos posibilidad pa carga e responsabilidad na cas cu famia, pero ta su situacion financiero ta obliga e trahado di keda den esaki, ta hay’e obliga pa sigui traha den situacionnan precario.
SEPPA ta haya un contradiccion cu nos kier papia di problemanan social, sin mira kico ta pasando akinan ? Trahadonan cu no mucho informacion, presiona y den mayoria di caso ta ser obliga pa firma un acuerdo, muy a pesar cu nan sa cu esaki ta desfaborece su persona, y tin hasta contra reglanan. Pues pa trahadonan cu un entrada abao, e barera di independencia personal pa financiero ta mustrando uno insuperabel.
Na ocasion di e momento special aki pa trahadonan di Aruba y rond mundo, SEPPA ta manda palabranan di pabien pa cu e dia aki pa tur trahado na Aruba, pa hiba un reflexion profundo riba e dia aki di 1 mei! E dia aki no a bin sin un lucha, sin perdida di bida, sin cu a derama sanger y mester haya su balor. Esaki no por wordo mira como dia liber, simplemente pa no ta trahando riba e dia aki.
