Hopi expectativa riba resultado di dialogo tripartite social laboral

ORANJESTAD- Awe pa 9’or di mainta ta cuminsa e prome congreso di e dialogo tripartite entre gobierno, gremio comercial y sindical na La Cabana Resort.

Tanto e gremio comercial como sindical a expresa interes di forma parti di e asina yama dialogo tripartite social laboral, promovi pa minister di labor, Glenbert Croes. Mientras cu gremio comercial a expresa su interes particular y nacional; e gremio sindical lo ta mas na expectativa di e resultado di e dialogo aki.

Presidente di FTA, Hubert Dirksz tabata menos modesto y mas critico riba e realidad social-laboral cu nos pais ta pasando aden. Pero tambe pa reflexiona riba situacion di siguridad y salud riba mercado laboral.

El a declara cu tin hopi topico cu mester di atencion, entre nan e situacion financiero di pais Aruba, considerando cu poder di compra a bay atras. Pero e situacion social ta uno masha preocupante cu ta afectando nos pais. “A lo largo, e ta bay impacta tur caminda. E ta bay impacta e bida di nos tur, sin papia mes si e ta yega afecta nos economia, cu lo por tin consecuencianan fatal, ”segun presidente di FTA.

Dirksz a bisa cu FTA tambe a yega di participa den e dialogo nacional organisa pa e gobierno anterior, y esun cu ta wordo organisa aworaki, pasobra nan ta considera cu dialogo ta importante na tur nivel.

E ta kere cu esaki ta e unico manera pa kita e polarisacion cu nos a conoce na Aruba pa hopi aña. Pero e mester ta un dialogo cu respet y cu participacion di tur. Nan a traha un agenda cu varios tema organisa segun nan prioridad. E prome di nan ta ley di ARGO. E sindicalista tabata masha cla di bisa cu si tin decision cu ta rekeri cambio di ley, ta parlamento ta haci e, ya cu parlamento pueblo a vota. E tabata cla pa bisa cu pueblo no a vota pa gremio sindical ni comercial. Pero ora cu un decision tin un base amplio, e ta bira mas facil pa nos organo legislativo.

E sindicalista a agrega cu e metodo cu nan ta bay utilisa di ILO ta bay duna oportunidad pa tur lider di fraccion den parlamento por duna nan aporte na e resultado di e dialogo tripartite social laboral.

Presidente di FTA a elogia cu nan a uza structura di ILO pa realisa e dialogo aki. El a cualifica esaki como un bon structura pa cana e caminda cu nan mester cana. “Pero esaki no kiermen cu nan lo por soluciona tur cos…,” el a bisa.

Tambe el a bisa cu e dialogo aki lo resulta mas facil pa gobierno lo por haya decisionnan pa situacionnan mas dificil. Igualmentem e sindicalista di FTA ta haya cu parlamento di Aruba lo por tin un base mas amplio pa tuma decision di parti di e gremio sindical, comercial y gobierno riba e diferente topico.

Di su banda, presidente di sindicato STA, Diego de Cuba, a cualifica como ‘bastante complica’ e trabou realisa durante 8 luna pa e comision tecnico encarga cu e prepara e dialogo aki. De Cuba a bisa cu e biaha aki nan kier mira algo real, unda tur gremio na Aruba ta participa. Pero cu tur e partidonan envolvi tin algo di bisa.

El a laga sa cu e structura cu ta wordo uza den e dialogo aki, ta di acuerdo cu esun di Organisacion Internacional di Labor (ILO). Nan a compila tur e datonan di ILO pa realisa un dialogo di e caliber aki. Pero nan a hink’e den un structura cu –segun e sindicalista di STA- nan por acopla den e sistema cu nos ta biba cune na Aruba. E echo cu tin un structura ta haci cu cada partido sa di antemano na kico nan tin cu tene na dje.

Tambe el a trece su reflexion como sindicalista riba Dia Mundial di Siguridad y Salud na Trabou, celebra ayera. De Cuba a bisa cu tur dia, como sindicato nan por experiencia cosnan cu no supone di pasa riba e tereno aki. E ta spera cu e dialogo cu nan ta inicia awe lo habri e caminda pa drecha tur loke mester wordo drecha riba tereno laboral y social.

Omar Tromp di Camara di Comercio (KvK) a bisa cu nan ta convenci cu na mesa hunto nan por trata diferente topico di interes particular pa comercio, pero tambe general pa pais Aruba. E ta kere cu den un escenario asina, nan por yega na consenso y decision clave pa e futuro di e parti laboral y social di Aruba. Otro gremio di dunado di trabou cu lo participa den e dialogo aki ta ATIA.