23mei, NW, otmar all inclusive (3).jpg

Minister di Turismo Otmar Oduber a reacciona riba abogado Wix, kende a sali cu un tono bastante fuerte den medionan di comunicacion. “Normalmente e tin un tono fuerte ora cu e ta papia. Mi ta compronde tambe. Pasobra nos ta mira aworaki cu diferente hende ta defende nan interes propio.” Segun e mandatario a inicia cu e ley algun aña pasa y ainda ta trahando riba esaki. Gobierno a acerca Price Waterhouse Cooper pa nan haci un analisis riba e situacion di All-inclusive.

Den e caso aki, sr. Wix tambe ta defende su interes di su entrada como abogado, segun e mandatario. Gobierno sa cu e ta representa mayoria di e hotelnan Spaño, den e caso aki All-inclusive. Tambe e ta representa otronan cu kier bin Aruba ainda. “Atrobe bo ta haya un abogado, den e caso aki mi amigo Wix, cu ta defende su interes, cu ta un interes personal,” segun minister Oduber.

3 aña pasa a cuminsa cu e ley
E mandatario a indica cu na diferente ocasion el a bisa cu e ley aki ta un ley cu no ta awe of luna pasa of seis luna pasa cu nan a cuminsa traha riba dje. Tres aña pasa gobierno a cuminsa traha riba e ley aki, na momento cu Westin a wordo bendi. Te cu un aña pasa mas o menos nan a cuminsa hinca esaki den un forma di ley mes despues cu estudionan a wordo haci.

Haci analisis
“Mi a tuma nota di declaracionnan como si fuera cu hendenan ta pidi pa ban para un rato y ban haci estudio,” el a sigui bisa. E mandatario ta lamenta esaki pasobra e seriedad cu tabata tin na momento cu Westin a wordo bendi, of na momento cu Radisson a hera wordo bendi y nan a bay corte cu tur e asociacionnan aki na Aruba, tur a uni aparentemente a warda e dolor pasa y no a percura pa sigui traha pa evita cu esaki sosode un biaha mas manera ta sosodiendo na e momentonan aki cu ta un peliger grandi cu un otro hotel atrobe por wordo tuma over. Segun minister Oduber, nan si a percura pa estudionan a wordo haci, nan si a percura pa Price Waterhouse Cooper (PWC) haci un analisis pa gobierno. “Un analisis cu tabata dificil pa cumpli cun’e, pasobra no tin cifranan pa por a substancia den e caso aki e efectonan economico di All-inclusive. Y pa motibo di esey a haci un analisis e ora di e estudio aki conhunto cu un cantidad di otro estudionan cu a wordo haci den exterior.” P’esey a crea tambe un estudio di Price Waterhouse, un sinopsis caminda cu a inclui no solamente loke PWC a tuma den constelacion, atrobe traha pa PWC, pero a inclui otro hopi estudio cu a wordo haci.

Estudio haci
E mandatario a sigui indica, cu no solamente haci un e estudio pa cu e situacion di Aruba, pero por mira gran cantidad di estudionan a wordo haci den un gran cantidad di destinacion caba riba e aspecto di All-inclusive. E tin su pro y su contra. “Tur estudio cu bo haci serio, p’esey mi tabata transparente den e rapport aki, cu por cierto desde 2 di februari e rapport aki a wordo comparti cu e directiva di Aruba Tourism Authorithy. Nos tur sa cu den e directiva aki tin 3 miembro di AHATA, nombra y nomina pa AHATA pa ta den e directiva aki,” minister a indica. “Na tur momento cu a wordo pidi pa duna e rapport aki, nos a percura pa duna nan esaki. ATIA a pidi e rapport, nos a percura pa duna nan, Parlamento fraccion di AVP a pidi’e y nos a zorg pa duna nan. Asina ey nos ta duna tur hende, pasobra e ta un rapport transparente, e ta un rapport cu ta haci un balansa entre e aspectonan positivo, e impacto positivo di All-inclusive na Aruba traves di e rapport di PWC. Pero tambe otro estudionan cu a wordo haci internacional. Pero di otro banda ta mustra tur impacto negativo cu tabata tin. Ora di pisa e aspectonan negativo compara cu e aspectonan positivo, e ehempel bibo den luganan caminda cu tin All-inclusive, bo ta mira e revpar ta hopi abou, bo ta mira cu e calidad di producto ta hopi abou, contrario na otro destinacionnan cu si a percura pa inverti den nan producto manera Aruba y bo ta wak cu e revpar ta halto y por lo tanto e impacto riba bo economia ta hopi halto.”

AHATA no tin cifra
Minister ta lamenta cu por scucha di diferente representante di AHATA a haci un declaracion y na television ta bisa cu no tin un estudio, kiermen taxistanan cu ta critica, restaurantnan cu ta critica, e diferente operador di tour cu a manda un carta pa minister, whole sales, retail stores, cu eigenlijk niun no por papia pasobra no tin cifra. AHATA tampoco no tin cifra, segun e mandatario. Mientras cu tin un gran cantidad di destinacion cu ta mustra di e impacto negativo cu tabata tin, e mandatario a pidi na diferente ocasion pa trece algun ehempel unda All-inclusive si a haci impacto positivo den e destinacion ey.

Partinan negativo
“Nos ta mira un gran cantidad di estudionan cu ta mustra riba e partinan negativo, pero te dia di awe nos no por haya un destinacion caminda cu All-inclusive a yuda e destinacion ey,” minister a bisa. En todo caso uno cu ta comparabel cu Aruba. “Tur hende sa kico a tuma luga na Jamaica, Cancun, Republica Dominicana, na Mexico, na Mallorca, na tur e luganan aki pa motibo cu nan no tin un producto di calidad, a pone cu nan a haci di nan destinacion un destinacion di masa, un destinacion di gran bishitante pero cu ta paga tiki placa y no ta contribui na un forma substancial na e economia di e pais ey. P’esey mi ta lamenta tambe cu den e diferente publicacionnan cu AHATA a pone ultimamente, atrobe mi ta weita cu e atakenan ta bira mas fuerte, mas personal. Cierto mi ta considera cu hasta ta falta respet, esey ta keda naturalmente na AHATA y di nos banda nos ta keda habri den dialogo manera semper nos a haci.”

LEAVE A REPLY

Please enter your comment!
Please enter your name here