Despues cu Bon Dia Aruba a publica cu gobierno no kier informa riba e epidemia di Zika, Departamento di Salud a manda dos relato pa prensa, bisando cu ‘no tin confirmacion cu ta Zika’.

Sinembargo Bon Dia Aruba ta keda para tras di e informacion duna den e articulo pa motibo cu e maneho di Departamento di Salud ta na haltura cu tin un problema desde december aña pasa. Y pa motibo di falta atencion y asina keda sin informando publico pa tuma medida di proteccion, manera e departamento pa hopi aña si tabata haciendo, e problema a crece y bira un epidemia.

Awor cu nos a publica nos articulo diamars, diripiente Departamento di Salud (DVG) ta bin cu informacion pa publico indicando cu nan ta haci un investigacion. Pero den e relatonan cu nan a manda prensa nan ta admiti si cu: ‘loke ta preocupa ta cu e sintomanan ta similar na e virusnan causa pa sangura. Ta mirando mas den e direccion di Zika como cu no ta presenta sangramento y otro complicacion cu ta bin cu dengue’. Esaki ta locual Wilmer Salazar di e departamento a expresa.

Epidemia
Sinembargo den e relatonan nan ta keda enfoca riba un ‘fever-rash’ syndrome cu e sintomanan di rash, keintura y iritacion di wowo. Aunke nan tambe ta admiti cu ‘na Corsou Zika ta circulando y tabatin un cantidad grandi di caso entre october y november ultimo, na Boneiro tambe tabatin mas caso di Zika, y ta pensando den e direccion aki pa cu e syndroom detecta na Aruba, pero haya confirmacion ta dificil’. Pero aki na Aruba no tin confirmacion ainda, segun e departamento, solamente di 27 casonan Zika y 9 di Chikungunya na januari, Pero si e departamento ta indica cu awor tin 619 caso di e rash-fever syndrome. Pero segun nos fuentenan fidedigno tin un epidemia di Zika.

Bon Dia Aruba tambe ta haya hopi señal di dokternan di cas cu ta bisa cu ta trata di Zika. Tambe for di laboratorio nos ta haya mesun señal y internamente den e Departamento di Salud mes preocupacionnan a yega nos horeanan.

Bronkitis
Bon Dia Aruba ta keda para riba e informacion cu tin 700 casonan sospechoso di cual 400 ta Zika. Tin dos muhe na estado cu tin e virus tambe anto tin 6% chens cu nan baby por haya microcefalie. Banda di esaki tin indicacion cu casonan di bronkitis tambe tin un relacion cu Zika y na Aruba nos a constata cu tin basta pashent cu bronkitis. Tambe dokternan internacional ta investigando e relacion entre e virus aki cu malesanan di curason.

Pariba di brug mas afecta 
Locual gobierno si a haci awor ta informa riba e areanan for di unda hopi notificacion ta sali, esta mas tanto pariba di Aruba: San Nicolas, Savaneta y Pos Chikito. Tambe DBZ, Dienst Besmettelijke Ziektes, ta haciendo un investigacion ‘cu ta encera monitor tambe e adresnan unda cu e pashentnan ta biba pa tin un miho idea di e barionan, pero asina mes, no kiermen cu ta den su mesun bario e malesa a origina’, gobierno ta informa.