Un autobus cu tabata huy a mata 34 persona y a laga 15 hende herida na ciudad di Gonaives, na 150 kilometer di capital di Haiti, Proteccion Civil a informa.
“Den cuminsamento e bus a dal dos persona cu tabata cana, lagando asina un persona morto y e otro a keda herida” Marie Alta Jean Baptiste, directora di Proteccion Civil a bisa. “Despues cu e bus a dal e dos personanan anto e bus a huy y a haya den su caminda tres grupo di musico cu tabata cana. “E caminda tabata scur y 33 persona a muri”, e directora di Proteccion Civil a informa.
Servicio di ayudo a yega lihe na e lugar y a hiba tur hende herida pa hospital di Gonaives. Polis tabata controla e hendenan di e poblacion ey, cu tabata hopi rabia pa e situacion cu a presenta eynan. “Hende cu no a bira victima di accidente a purba di kima e autobus cu tur pasahero aden”, Faustin Joseph, coordinador di Proteccion Civil na departamento di Artibonite, a bisa.
“Bus, su pasaheronan y chauffeur a keda bao seguridad na warda di polis di Gonaives”, el a detaya. Otro incidentenan a keda registra na e lugar, caminda e bus a dal asina hopi persona, pero despues trankilidad a bolbe, autoridadnan a informa.
