Autoridadnan federal di Merca ta aclaria cu ningun placa di impuesto lo ser usa pa pipanan mas sano

(AP) – Despues di problemanan den politica derechista, e administracion Biden a bisa diaranson cu un programa pa yuda preveni dano adicional na personanan cu ta haci uso di droganan ilicito no lo paga pa pipanan mas sano pa huma crack of meth.

“Ningun fondo federal lo ser usa directamente ni indirectamente pa pone pipa den e kitnan ‘safe smoking’,” secretario di Health and Human Services Xavier Becerra y consehero di politica di droga di Cas Blanco Rahul Gupta a bisa den un declaracion.

Secretario di prensa di e Cas Blanco Jen Psaki a bisa separadamente cu esaki no tabata e intencion, kehando cu e impresion aki a ser causa pa “reportahenan cu no tabata basa riba hechonan.”

Dialuna tabata e deadline pa organisacionnan di servicio y gobiernonan estatal y local aplica pa un parti di 30 miyon dollar di placa federal pa esfuersonan di “reduccion di daño” cu e intencion di preveni malesa, herida y otro traumanan colateral cu personanan adicto na droganan ilicito ta sufri.

E peticion original pa proposicionnan pa fondo di Substance Abuse and Mental Health Services Administracion a pone den lista un “safe smoking kit” entre e articulonan cu por ser cumpra cu placa di personanan cu ta paga impuesto. Esaki ta entre varios categoria manera droganan cu ta preveni sobredosis, caha di medicamento, ‘testkit’ pa malesanan infeccioso y container pa por deshaci di e hanguanan. E solicitacion no a specifica ni menciona pipanan, aunke nan pro ta parti di un kit pa humamento mas sano.

Esaki a causa cu algun reportahe online a bisa cu e administracion Biden lo usa placa federal pa paga pa ‘crack pipes’. Algun senador republicano a critica fuertemente e administracion riba e red social Twitter.

Vocero di HHS Sarah Lovenheim a publica cu reprotahenan di e tipo aki “ta un ehempel cla di mal informacion” y diaranson durante e conferencia na e Cas Blanco Psaki a bisa cu papa pa e pipanan aki nunca tabata parti di e plan.

“Nunca nan tabata parti di e kit aki,” Psaki a bisa. “E informacion aki ta producto di reportahe mal traha y nos kier a duna boso informacion pa rectifica esaki cu e informacion corecto.”

Pipanan traha na cas pa huma crack of metamphetamina por kibra hopi facil y tambe emiti humanan toxico. Pa causa di esaki, pipanan mas sano y sigur por ta un di e componentenan di e ‘safety kit’. Pero e kitnan aki tambe por inclui otro articulonan manera un paña cu alcohol pa limpia bo mannan of e pipa mes prome cu uso.