Minister di Husticia: participacion di Arumil den e cadena di husticia ta crucial

Autoridadnan conoce cua ta e ‘blindspots’ di e radar di tanto Wardacosta como Polis pero esaki no ta nifica cu no tin bista riba locual ta sucede na e areanan aki.

Asina Minister di Husticia Rocco Tjon a bisa Bon Dia Aruba. E ‘blindspots’ aki ta particularmente den area panort di e isla, pero esey no ta nifica cu autoridadnan ta ciego pa nan y como tal ta trahando den ekipo pa percura tin miho bista full rond di Aruba.

“Nos a introduci recien un plataforma strategico, esta un strategia di reunion structural riba cuido di frontera. Na mesa tin Cuerpo Policial di Aruba, Guarda Nos Costa, Wardacosta, Inmigracion Aruba y denter di poco Duana tambe lo forma parti di dje, mescos ta e caso cu NCTV cu ta e coordinado nacional pa seguridad y combatimento di terorismo. Eyden nos lo mester yega na e palabracionnan strategico pa percura cu ta cera e buraconan (den e wowonan di e radarnan). Tin bon cooperacion, uno cu ta mehorando constantemente,” Rocco Tjon a sigura. “Entre Wardacosta y Polis Maritimo, ta percura cu e fronteranan ta hermeticamente cera.”

Cuido di frontera

E trabao pa cuida frontera ta un elemento esencial den e landspakket pa loke ta husticia y seguridad. E meta di reforma ta pa contribui na fortifica e estado di derecho, entre otro door di enfoca riba fortificacion riba control di frontera, bringa criminalidad economico/financiero y

mehoracion di e sistema di detencion. A dicidi pa motibo di e urgencia pa stabilidad di orden publico y seguridad cu no ta rekeri Aruba pa haci recorte den e capacidad di ehecucion operativo denter di mayoria di e sectornan mas vital pa estado di derecho. Esakinan ta Cuerpo Policial, Duana, Landsrecherche, Ministerio Publico, Corte, Wardacosta, Instituto Coreccional Aruba (KIA) y e servicio di seguridad. E reformanan ta continuando basa riba e investigacion di base cu a entrega riba 29 di Januari 2021 (e nulmeting).

Aruba a yega na un acuerdo cu Hulanda na Februari riba fortificacion di supervision di frontera cu a drenta na vigor dia 1 di April ultimo. E ta encera en todo caso riba e esfuerso, capacidad y administracion, control di comando di parti di Koninklijk Marechaussee, Duana y Wardacosta. E base di e protocol firma a cuminza implementa e palabracionnan.

Camber di radar mester ocupacion continuo

Segun Minister Tjon e sistema cu Aruba tin y esun di Wardacosta mester por complementa otro. Mester percura cu e tecnologia ta acopla na otro, pero tambe den e sala di monitoreo, esta e radarkamer. “Mester tin ocupacion continuo den e camber di radar, y esey ta e palabracion cu nos a haci durante e prome reunion. Esta cu nos no ta bay traha cu personal di Cuerpo Policial so, cu personal di Wardacosta so, of cu di Duana so. Nos ta bay traha cu teamnan mescla y asina ta uni e forsanan, percura pa un ocupacion di 24 ora den e camber di radar,” Minister a sigui bisa.

Ademas di un miho monitoreo di e imagennan di e radarnan, mester complementa e trabao aki cu mas patruya na costanan di Aruba. “E team di control di costa ta un palabracion haci y aki Guarda Nos Costa lo forma un parti activo den dje. Cu Duana mester papia ainda. Pero pa por garantisa cu ora cu señala algo riba radarnan, tin suficiente personal paden pa guia e patruyanan riba caya, pa wak e situacion na costa.

Arumil mester haya papel mas activo

E Minister a bisa cu pa yuda cu e trabao aki ta evaluando e papel cu miembronan di Arumil por hunga den e cuido di frontera. E tema di Arumil tambe ta forma parti di e landspakket riba husticia. Aruba, cu ayudo di Defensa Hulandes a presenta un plan di accion pa adapta e leynan di

servicio militar obligatorio cu a bira bieu. E adaptacionnan ta necesario pa entre otro

profesionalisa Arumil unda entre otro ta busca forma pa e fluho di miembronan di e

cuerpo militar Arubiano pa otro partner di seguridad nacional ta keda hancra. E ta inclui un

plan di accion dirigi na profesionalisacion continuo di Arumil unda servicio obligatorio ta

parti di dje. Aruba y Hulanda ta trahando riba actualisacion di e ley aki, y e trayecto di investigacion a cuminza memey di September ultimo.

“Mi mester bisa di ta contento di tur cu ta mesa ta de acuerdo cu e papel di Arumil ta un balor agrega. Awor ta buscando e miho construccion. Di e forma aki e grupo di trabao cu ta trahando e investigacion por incorpora e idea aki den e proyecto,” Tjon a ilustra.

Papel di helicopter ta pa complementa radar

No ta un secreto publico cu ta usa e area di noordkust pa ‘dropping’ pues hopi droga ta drenta e isla y e area no ta facil pa patruyanan di polis yega. “P’esey ta importante cu nos tin nos helicopter cu si por yega na e area, haya e informacion necesario y guia e patruyanan. E ta hopi importante y esey ta e meta final, pa Aruba ta hermeticamente cera, pasobra for di leu por wak e menasa ta yega y asina por mobilisa unidadnan pa intercepta cualkier acto criminalidad.”

Criminalnan ta innova modus operandi continuamente

Tin un bista con ta usa Aruba como hub pa criminalidad. Autoridadnan mes ta acumula e datonan y ta compila esakinan den e analisis di criminalidad, unda ta inclui tur aspecto y ta pone nan riba mapa. “Realidad ta cu tin consumo local di droga, pues un parti chikito ta keda Aruba. Pero mayoria biaha ta usa Aruba como ‘springplank’ pa exporta pa Europa y Merca.”

Autoridadnan tin idea con e droga ta drenta, a pesar cu Aruba a inverti hopi den mehora deteccion y intercepcion di droga. Por ehempel, inverti den cacho special, den otro tecnologia na nos puertonan. “Tin hopi modus operandi. Pero e mundo di criminalidad ta keda innova. P’esey ta importante cu nos como pais ta keda inverti pa nos keda inverti den nos cadena hudicial pa por ta keda na e paso di e forma aki. Obviamente mi no por bay den mucho detaye, pero tin diferente forma con nan ta haci’e (pasa droga via Aruba), y nos tambe ta invertiendo pa intercepta e diferente transaccionnan aki,” Minister Tjon a bisa agregando cu ta ricibi inteligencia den forma continuo cu ta yuda delinea e pasonan cu mester tuma na nivel strategico y nivel operacional.

Europa y Merca

Mayoria di e trafico ta pa mercadonan na Merca y Europa y segun Minister Tjon, e paisnan ta consciente di esaki tambe y ta haya e sosten pa trabaonan na Aruba.”Tur e trabaonan ta interregional. Nos tin gruponan di trabao cu ta traha hopi cerca cu Merca, manera CBP, DEA, ta partnernan strategico cu ken tin reunionnan structural. Y cu Hulanda ta mescos, tanto cu e departamentonan y cu instancianan operacional, manera Koninklijke Marechaussee y Polis di Hulanda.

Wardacosta

Los di e trabaonan na nivel di husticia, Wardacosta tambe ta encarga pa mantencion di e leynan pa proteccion di naturalesa. Y segun Minister, ta un aspecto operacion di Wardacosta cu sa kico ta su tarea. “Mi mester bisa cu nan tin atencion pa e parti ey,” Rocco Tjon a sigura, specificamente riba e tereno di proteccion di especienan protegi segun e ley di proteccion di naturalesa.

LEAVE A REPLY

Please enter your comment!
Please enter your name here