Pasaheronan di un avion di British Airways a haya sorpresa di nan bida na momento cu e avion a baha na e destinacion robes. E avion cu a sali di London cu destinacion pa Dusseldorf (Alemania) a haci un aterisahe na Edinburgh (Scotland) sin cu e tabata planea.
Segun e fuente CNN ta spica, e eror a bin door cu a yena e asina yama ‘flight plan’ incorectamente. Consecuentemente tanto e piloto como e tripulacion a kere cu e avion su destinacion tabata pa Edinburgh. E vuelo tabata ser opera pa e compania WDL Aviation den nomber di BA CityFlyer cu ta un subsidiario di British Airways. E yenamento incorecto di e flight plan a ser haci na e oficina di WDL na Alemania. Despues di a aterisa na Edinburgh, e avion a lanta vuelo bek y a baha na Dusseldorf.
E compania WDL Aviation a declara cu nan ta trahando conhuntamente cu autoridadnan competente pa mira ta unda e bruhacion a bin. Nan ta pone enfasis cu na ningun momento e seguridad di e pasaheronan a ser comprometi.
