“AVP tabata e prome y unico partido politico cu a hiba campaña pa legalisa marihuana na Aruba”

Mike Lampe y Melvin Tromp mester siña conoce historia di AVP!

Ta parce cu e politiconan di AVP cueste loke cueste kier sigui manipula mente di pueblo. No ta falta un dia cu e politiconan mediocre aki den nan desesperacion ta sigui lansa mentira y instiga pueblo contra MEP. E biaha aki nan a kier uza e asunto di legalisacion di cannabis medicinal como nan punto di atake contra partido MEP y esaki despues cu nos Ministro Dangui Oduber a anuncia cu lo bay legalisa cannabis MEDICINAL dentro di poco. No ta nada nobo y ningun secreto pero durante campaña pa eleccion 2017 nos partido ya a trece e topico aki padilanti den nos programa ‘Hunto p’e cambio’.

Politiconan pitufo di AVP
Alavez durante tur e debate y reunionnan politico nos partido a vocifera e idea di legalisacion di cannabis medicinal ya cu nos ta consciente cu nos como ser humano no por depriva tur e personanan cu ta hayando alivio di nan malesa, entre otro cancer y epilepsia door di uza cannabis medicinal. Y cu hopi enfasis nos partido a bisa tambe cu legalisacion di cannabis recreacional no ta riba nos agenda. Pues ta mas cu logico cu e idea di legalisa cannabis medicinal tambe a ser incorpora den e programa di gobernacion di partidonan MEP-POR-RED. Y no ta manera cu e politico fracasa Mike Lampe a trece padilanti cu “MEP a dobla pa partido RED” y cu “tin tension hopi halto internamente den seno di gobierno”. Claramente ta mustra cu e politico aki – papiando riba cannabis – den su imaginacion ya a cuminsa mira pitufo tur rond di dje, sin cu e ta consciente cu nos ta papiando aki riba uzo di cannabis medicinal y no recreacional. Otro politico di AVP cu tambe a cuminsa mira zombie tur caminda ta Melvin Tromp cu awor kier pa “minister anuncia nomber di grupo cu ta den plantacion di marihuana”. Ki locura!

Green Revolution
Sinembargo den tur e atakenan di locura di parti di partido AVP nan no ta corda riba tur e pashentnan cu ta ricibiendo alivio y otronan cu ya a haya alivio uzando cannabis medicinal, pero pa puro weganan politico nan kier hinca miedo den pueblo y instiga cu e gobierno actual lo bay legalisa cannabis recreacional.

Por ultimo, lo ta bon pa e politiconan di peso pluma Mike Lampe y Melvin Tromp kendenan ta wordo uza pa partido AVP pa haci bochincha riba e topico aki, bay informa nan mes cual ta e prome y unico partido politico na Aruba cu a hiba campaña pa legalisa marihuana (cannabis recreacional!) na Aruba. Nan lo por bay puntra nan ex-lider Henny Eman cual ta e partido cu den e añanan 70 a hiba e campaña “Green Revolution” (Burke y Nicolaas) pa legalisa marihuana na Aruba. Te hasta e blachi di marihuana nan a uza den e campaña di partido AVP pa logra nan meta di legalisa marihuana. Hende sa come y lubida pero historia politico por ta cruel di berdad!

 

You May Also Like

‘Economia y bo bienestar? Haya sa con abo tambe por beneficia di esaki!’

Den e ultimo 100 aña, Aruba su economia a conoce desaroyonan grandi, destacando su ...

Angustia y inconformidad den comunidad pa cu Parlamento di Aruba

  –Algun siman pasa tabata sumamente lamentabel y penoso pa wak e nivel di ...

‘IMF preocupa cu implicacionnan di promesanan di campaña’

Parlamentario, Richard Arends a mustra cu durante reunion cu delegacion di fraccion di AVP ...

“Nos ta scucha pueblo, pa bo por traha pa pueblo”

Riba diadomingo 7 di mei nos a participa den e evento di “1000VOZ”. E ...

PPA a presenta un masterplan pa siguridad di Aruba

Durante di e prome conferencia di PPA teni na hogar di nan presidente sr. ...

‘Den dos luna di gobernacion Minister Oduber a pidi 12 miyon caba’

Parlamentario Marlon Sneek(AVP): Asombroso con un politico cu experiencia manera Minister Oduber(POR), por manipula ...