CAft ta señala tambe gastonan colectivo halto (48,5% di GDP)

ORANEJSTAD – Durante e charla cu presidente di CAft a duna diahuebs pasa, dilanti di un audiencia bastante grandi na Hilton Hotel, a toca tambe e tema di gastonan ‘colectivo’ como porcentahe di Producto Interno Bruto (PIB; GDP).

E gastonan aki ta encera e gastonan di gobierno mes, mas e diferente fondonan pa cual ta cobra placa di e ciudadano y di e empresanan, pa cubri cierto servicio o tarea publico cu ta considera indispensable. No ta sosode regularmente cu nos ta tira un bista riba e aspecto aki, pero e tin su importancia. Sigur si e tendencia di sigui subi ta implica cu menos placa ta keda disponible pa e ciudadano individual y e empresario individual mes dicidi na kico ta gasta esey, of spaar esaki, si nan ta desea.

E gastonan colectivo aki, cu ta encera, banda di e presupuesto di gobierno, tambe loke e pais ta dedica na por ehemplo AZV y e fondonan di pension (SVb) cu a crece den ultimo añanan considerablemente; di 46% di GDP na 2017 esaki a bira 48,5% na 2018, segun CAft. Esaki, entre otro, bao influencia di e aumento di e porcentahe cu ta bay pa AZV (1% di BAZV acerca). Ya cu talvez un porcentahe no ta bisa tanto, nos ta tira un bista riba e gastonan colectivo, manera nan ta aparece den e conseho di Raad van Advies riba presupuesto di 2017, 2018 y 2019, respectivamente. Aki por observa cu pa gobierno central, e fondonan di seguridad social y otro entidadnan gubernamental, e entradanan total tabata respectivamente 2.042 miyon (2017); 2.258 miyon (2018); y 2.304 miyon na 2019. E gastonan a subi di 2.089 miyon (2017) pa 2.152 miyon na 2018, pa yega na 2019 na 2.303 miyon. Den e añanan aki, cu nos economia apenas creciendo bao influencia di un turismo ainda den bon condicion, e tendencia cu CAft ta pone nos dilanti ta algo di preocupacion.

E pregunta cu mester contesta ta, cu si nos no por realisa mas crecemento, apenas 1% di GDP pa hopi aña nos dilanti, unda ta bay corta gasto. Nos por revisa nivel di pago di AOV, nivel di servicio di AZV, pero probablemente un gran mayoria di e ciudadania no lo haya esey un bon alternativa. Tin otro gasto di gobierno cu tambe ta dificil pa reduci, manera e nivel di interes, cu pa 2019 ta yega na e nivel di 229,7 miyon florin, como 16% di e gastonan total di gobierno central. Si nos no kier corta den e gastonan di seguridad social y medico, ta bira inevitable cuminsa mira nos gastonan di personal. Y esakinan ta halto. Segun e criterio cu ta maneha den e raportahe pa CAft, ta menciona solamente e gastonan di e servicionan cu ta cay bao di e ministerionan. E payroll total aki ta den careda di 480 miyon Florin pa aña. Por cierto, a acorda den e ultimo protocol, cu e limite maximo pa 2019 lo ta 478,6 miyon Florin.

Sin embargo, pa por tin un impresion di e gastonan total di personal pa cual gobierno ta responsable, incluyendo entre otro enseñansa no publico, subsidio di personal den fundacionnan, etc., por recomenda un bista den e conseho di Raad van Advies. E gastonan total di e sector colectivo ta alcansa 792,9 miyon Florin, di cual 735,2 miyon Florin ta pa cuenta di gobierno mes. Un indicacion mas fuerte ainda cu cos no por sigui asina?

You May Also Like

Problema dump (1).jpg

Gobierno tin pensamentonan Green pero en realidad ta haci otro

Awe a tuma luga e apertura di e 7 edicion di e Green Conference ...

lilly bekker servicio dokter.jpg

Dr. Lili Beke-Martinez : “Nos semper a traha cu amor y cariño pa nos pashentnan”

Entrante mañan, Dr. Lili Beke-Martinez no lo continua su relacion cu AZV como dokter ...

Empleado kita for di trabao na Trigas relaciona cu caso di fraude

Manera nos a informa, e compania Trigas tambe tabata victima di fraude y malversacion ...

Parlamento Aruba

Presupuesto di Contraloria General y Parlamento 2016 a keda aproba

Diamars den comision central di Parlamento a tuma luga e tratamento di e presupuesto ...

veterano di guera Korea a fayece na Aruba 1.jpg

Veterano militar di Guera di Korea a fayece na Aruba

Siman pasa a fayece na Aruba un heroe y militar veterano di e Guera ...