Ayera mainta por a tuma nota ariba rednan social y algun medio di comunicacion cu tabatin, un biaha mas, molester di awa sushi y holo insoportabel den e area di centro di ciudad frecuenta pa turistanan crucero.
E problema di rioolering y mal holo ta keda persisti den e area aki cu ta altamente trafica pa turistanan crucero. Ayera tres diferente barco crucero a bishita nos isla treciendo mas di 12 mil turista. Pero e turistanan aki a encontra cu un sorpresa desagradabel, awa sushi y mal holo.
Reportero di Bon Dia Aruba a pasa den e area y a puntra algun di e bendedonan di kiosk tocante e problema aki. Un di e bendedonan a splica cu e problema aki ta uno cu nan ta bringando cune pa hopi tempo caba y ainda gobierno no a bin cu un solucion.
“Tur ora cu awa yobe esaki ta un problema. E holo ta insoportabel y turistanan mester cana den e awa sushi y soporta e holo super desagradabel aki. Imagina bo un turista mester bira malo of haya un infeccion pa motibo di e awa sushi? Esey lo ta hopi mal experiencia y propaganda pa Aruba”, el a indica.
El a sigui splica cu awe nan tabatin e opcion di pone pallet ariba e areanan cu tabata yena cu awa sushi pa yuda e turistanan cana, crusa caya etc., pero no tur ora nan tin pallet y e ora e turistanan mester trapa den e awa sushi pa nan por yega e kiosknan.
Otro bendedo a conta cu apart di e problema di awa sushi y mal holo nan tin problema tambe cu sushedad. Pues e turistanan ta cumpra bebida of cuminda y hopi biaha nan ta laga e sushi benta riba acera of poni un caminda, cu no ta un bar’i sushi.
“Mayoria biaha nos mes, e bendedonan, ta recoge e sushi pasobra si no eynan e lo keda. Ami mes a yama varios biaha DOW, pero nan no ta haci nada, nan no ta yuda. E ta echt fastioso y un bista mahos”, e bendedo a bisa.
Keto bay e bendedonan ta warda pa un solucion pa e problema aki cu ta keda un molester grandi y un peliger pa salud.
