Debe familiar mester… Combati cu educacion…?

Ministerio encarga cu asunto economico y desaroyo sostenible, a inicia un curso pa ciudadano pa siña administra nan finanzas mihor. Esey sigur ta algo util, si e no keda na algo unico pero bira algo regular. Esey no ta parce nos e problema tampoco, pasobra lo ta logico cu lo duna continuacion di esaki, teniendo cuenta si cu eventual aspecto cu por mehora.

Pero, e no por keda na esey so. Ta necesario pa conecta e esfuerzo aki cu tin, o mester tin, den cualkier sociedad. Tin mas punto unda trabao di gobierno ta toca e necesidadnan di e ciudadanonan cu tin mas problema pa tene nan cabez riba awa financieramente, y cu ta haya ayudo institucionaliza. Tambe tin esfuerzo di sector priva, di por ehemplo di un fundacion pa yuda individuo sali di nan problema financiero, directamente relaciona cu debe. Tin pais unda e tipo di ayudo aki ta sucede cu iniciativa di banda gubernamental, cu recurso di gobierno poni na disposicion pa logra esaki. Hulanda por ehemplo tin un ley encuanto ‘schuldsanering’ cu ta duna e cuadro obligatorio dentro di cual e ayudo mester tuma lugar.

Esaki no ta implica cu automaticamente nos mester pensa den e direccion ey, pasobra por ta cu den nos situacion tin un otro manera pa maneha esaki. Al fin y al cabo, medida legal semper mester bin na ultimo, ora otro instrumento manera informacion y ayudo haci posible via subsidio o gasto directo pa gobernacion, entre otro, ta resulta insuficiente. Nos no ta kere cu nos a yega caba na e punto pa tuma tal decision. Ademas, e caso di Hulanda ta requeri un sistema burocratico bastante pisa, involucrando e sistema hudicial. Ta imaginable cu cierto caso, tanto di persona natural como persona legal, ta termina den un caso di bancarota cu automaticamente ta bin dilanti huez, y e caso di e saneamento di debe tambe ta decision cu huez ta tuma. Ta bon pa considera tur aspecto di e asunto pa nos no tuma paso cu ta mustra bunita pero ta bira demasiado costoso pa maneha. Al fin y al cabo, austerizacion ta e palabra magico den e proximo decada.

En todo caso, ta logico cu pa e casonan individual di debe nos ta papiando mayoritariamente di individuo cu menos bon entrada familiar, aunke acumula demasiado debe por sucede hasta na nivel di persona cu tin un bon empleo fiho, y un bon entrada garantiza, tanten nan tin e empleo. Parti di e ciudadanonan cu ta termina den problema grandi ta esnan cu perde trabao y cu, por ehemplo, no por haya trabao fiho mas. Den e fase aki, inmediatamente tras di e crisis di Covid,y e actual crisis global, ainda nos no a yega na e grado di empleo cu tabata existi promer cu e crisis. Cifranan di SVb ta mustra nos cu na inicio di november 2022 ainda nos ta na mas o menos 800 cupo di trabao menos cu na inicio di 2019. Asina ta, nos mester conta cu problema financiero familiar lo ta un fenomeno mas amplio, por lo pronto.

Di e grupo menciona, cu ta den problema financiero, un parti ta cualifica pa e programa di bijstand. Esey ta den e caso cu e famia no tin ningun fuente di ingreso mas. Tin hopi caso unda un di e empleonan den un famia ta bay perdi, lagando nan cu debe imposible pa paga. Sin embargo, nan no por haya ayudo di bijstand den nan situacion, pasobra tin un o mas individuo cu ta aporta ainda na e entrada familiar. Esaki ta implica cu tin un grupo potencialmente grandi cu ta den zona di peligro.

Tambe nos por corda cu na 2014 e fundacion cu tabata brinda e ayudo aki, mester a para nan actividad pasobra gobierno a corta nan subsidio completamente. E fundacion ta awe den liquidacion y nos no ta mira un sucesor den e mesun sentido lo surgi pronto. Esaki ta haci cu gobierno mes lo mester considera haci algo, ya cu manera e ministerio mes ta reconoce, e situacion ta preocupante.

Asina por mira cu ta mustra facil pa cuminza cu un maneho pa brinda ayudo, pero finalmente nos ta termina mirando e necesidad di desaroya un maneho mas integral, cu ta tuma na cuenta con ta limita e problema di debe personal, pa por contribui na un desaroyo sostenible den sentido general y na nivel individual. Loke ta sucediendo awor, cu tur respet, ta piki e ‘low hanging fruits’. Un di e alternativanan ta incorpora e tipo di tema aki den educacion formal. Siña anda bon cu placa ta algo cu mester cuminza na cas, pero scol por yuda hopi, sin cu e ta afecta presupuesto gubernamental tanto. Esaki semper lo ta un asunto importante: con pa desaroya maneho efectivo, cu ta keda cu costo dentro di limite razonable. Lamentablemente den presentacion di e tipo di iniciativa aki, nos ta haya falta di mas profundizacion den e problema cu ta mustra tambe kico tin pensa di haci mas a largo plazo. Cu esaki nos ta bisa cu e iniciativa no ta bon? No, y esey pasobra informacion, tambe pero no exclusivamente via educacion, ta keda un di e instrumentonan mas importante pa cualkier gobierno, promer cu cuminza haci mas gasto cu otro instrumento. E aspecto di informacion, tambe di gobierno mes, no mester desaparece ora ta introduci otro alternativa pa ataca e problema. Hopi biaha nos no ta mira continuacion sistematico di esey.