Tur aña FAVI ta para keto y ta pone atencion riba dia internacional di garoti blanco cu strepi cora.
Ta importante pa e cliente di FAVI sa con pa usa su garoti blanco den trafico, pero tambe pa automobilista y ciclistanan sa con e cliente ta us’e. FAVI ta consciente cu su uso den trafico ta poco y ta p’esey mes ta importante pa keda conscientisa.
Durante 2020 FAVI a organisa entre otro caminata, paseonan entre otro na Linear Park, Avenida WattyVoz y tambe Palm Beach. Meta di esaki tabata pa keda practica e bon uso di e garoti blanco strepi cora y tambe duna nos clientenan tipnan practico con pa mobilisa cu seguridad den e pandemia di COVID-19.
Kisas den 2020comunidad no lo mira nos accion den grupo grandi, pero si individual y rond di nos isla. Ta p’esey nos kier keda cu e mensahe di tur aña: Si bo mira un persona ta cana cu un garoti blanco strepi cora den trafico, baha velocidad y si e kier crusa caminda, para y bis’e crusa numa. Den e pandemia aki FAVI a keda activo y a duna charla na scolnan y grupo di interes. Nos ta habri di dialuna pa diabierna di 8:00 pa 5:00pm.
Mundialmente e garoti ta conoce cambionan tambe. Por ehempel e color geel ta wordo añadi na garoti pa persona nan cu ta biba den cuidadnan hopi congestiona. Tambe muchanan por cambia e color pero mantene e reflectornan cora y blanco na e garoti. Esey ta nifica cu comunidad lo por topa clientenan di FAVI cu garoti blanco cu ros, blanco cu blauw y hasta geel.
Abo conoce e garoti blanco?
Un garoti blanco ta un medio auxiliar pa un persona cu tin limitacion di bista of un persona cu ta ciego. E ta un medio di identificacion tambe. Si bo mira un persona cu e garoti esey kiermen cu e persona aki tin un problema pa mira.
Un persona visualmente incapacita ta usa e garoti pa 2 motibo importante:
- Pa hala atencion di otro peaton y esnan participando na trafico, cu e persona en cuestion no ta mira bon of ta ciego. Ta usa e garoti di guia specialmente ora di crusa caya y tambe pa mobilisa su mes por ehempel rond di cas, den supermercado of den caya.
- Pa orienta den su mesun ambiente, pa localisa puntonan di orientacion y pa nota obstaculonan na tempo.
Na momento cu un automobilista, ciclista etc. mira un persona cu e garoti blanco strepi cora cu ta indica cu e kier crusa, e mester cuminsa baha velocidad y duna nan e oportunidad pa haci esaki.
Con un usuario di e garoti blanco ta indica cu e kier crusa?
E usuario di e garoti ta indica cu e kier crusa door di hisa su garoti stret su dilanti, ora el a yega na e zebrapad of caminda cu e ta bay crusa. Despues e ta scucha si e auto a stop y den aproximadamente 2 seconde e ta cuminsa na crusa e caminda. Ora cu e yega memey di e caminda e ta baha e garoti y ta fula pa e trottoir. Ora e automobilista mira un persona cu ta bay crusa cu su garoti, e por zona un pito suave pa asina duna e persona e señal cu e por crusa.
Con e guia di FAVI ta sucede ?
E terapista di revalidacion ta duna instruccion na e cliente con e uso di garoti mester sucede. Esaki por ta den e vecindario cu e cliente conoce y tambe na lugarnan desconoci pa e cliente. Despues cu e cliente ta domina e canamento cu e garoti e ta bay ariba caminda publico cune. E cliente ta siña usa su oido bon y ta siña interpreta kico ta e direccionnan pariba y pabao, crusa caminda etc.
Na Aruba sinembargo hopi cliente tin miedo di haci uso di careteranan. Un di e motibonan principal di esaki ta e trafico insigur. Cu e cambionan di infrastructura den diferente bario ta haci e ora cu nos di FAVI kier experiencia e rutanan nobo hunto cu e cliente.
FAVI ta compronde e miedo di su clientenan pa cana riba caya y p’esey ta haci un suplica na comunidad pa tene cuenta cu esaki. FAVI lo keda conscientisa nos comunidad y keda stimula nos clientenan pa haci uso di e garoti blanco strepi cora ariba caya y tambe den nan ambiente social.
