Mañan ta tuma luga e delaster dia pa vota na Consulado di Colombia y tambe e dia cu ta wordo celebra eleccion presidencial na Colombia mes.

E ta e dia cu ta wordo defini si e Colombianonan a eligi den e prome rond nan presidente nobo cu mester haya e mita plus un di e total di votonan valido . Of mester bay den e di dos rond y definitivo cu lo tuma luga un luna despues, dia 17 di juni proximo, entre e dos candidatonan cu lo haya e mayoria di voto mañan.

Cinco ta e candidatonan pa bira presidente di Colombia: Ivan Duque, Sergio Fajardo, Gustavo Petro, German Vargas Lleras y Humberto de La Calle. Esaki ta e prome biaha den un eleccion na Colombia cu su pueblo ta masha polarisa riba dos tendencia politico: Centro-derecha y izquierda.

Votacion na Aruba
For di dialuna ultimo e Colombianonan residencia den exterior a cuminsa vota den nan respective consulado di cada pais. Na Aruba e proceso di eleccion presidencial ta tumando luga sin mayor problema y den ordo civico den e consulado di Colombia situa na Julianastraat 4 for di 8’or di mainta te cu 4’or atardi. Alrededor di 5 mil Colombiano ta registra den nan censo electoral pa vota na Aruba.

Juliete Vaca-Ruiz kende ta miembro di e hurado di votacion a declara na Bon Dia Aruba cu e Colombianonan bibando na Aruba mester conscientisa nan mes ‘cu nan voto ta contribui pa bin cu un cambio den nos pais’.

E ta haya cu ta relevante pa nan sea consciente di eherce e derecho aki, pasobra tin hopi di nan cu no ta hacie debi cu nan no ta na haltura tur informacion rond di eleccion aki. E ta haci un yamado pa tur esunnan cu no a bay vota ainda pa bin eherce nan derecho. Aunke ta comprendibel cu nan no ta bibando na Colombia mes, pero nan voto por trece un cambio pa nan famia den nan pais.

“Si nos kier wak un pais miho nos mester eherce nos derecho, y esaki nos ta haci’e pa medio di e voto so”, el a bisa.

Vaca-Ruiz ta haya cu for di e prome dia e eleccion aki a haya un acogida, ya cu nan tabatin basta movecion. Pero ta importante pa tur hende plama e informacion pa bin vota, ya cu awe y mañan ta e delaster dianan pa bin vota na Consulado di Colombia na Aruba. E ta haya cu tin biaha e hendenan no tin mucho claridad riba e eleccion aki, apesar cu cantidad di informacion a wordo divulga via diferente fuente di informacion.

P’esey e ta haci un yamado pa e Colombianonan na Aruba sea consciente di nan voto y asina participa pa medio di dje den eleccion presidencial aki. “Esaki ta un cambio cu nos fei exterior ta dunando na nos pais, aunke cada un di e Colombianonan den exterior no ta mas na Colombia.”