‘Awo nos ta cuminsa na cero despues di 16 aña sin un gobernacion di coalicion’

Durante firmamento di acuerdo di formacion na Ayo Rock Formation ayera atardi Formador Evelyn Wever-Croes a subraya e 3 puntonan basico cu e 3 partidonan MEP, POR y RED lo bay mantene nan mes na dje ora di forma gobierno, esta: integridad y bon gobernacion pa mantene calidad di institutonan democratico, finansa publico den orden y pone ser humano central.

Durante e atardi por a mira un acogida bastante grandi di hende cu a yega na Ayo Rock Formation pa mustra nan soten of pa haya mas informacion di loke e gobernacion nobo lo encera. Sra. Wever-Croes a pinta den liña grandi kico lo ta e prioridadnan pa un gobierno di coalicion, cual pueblo no a mira den e ultimo 16 aña. Algun ciudadano a duna nan comentario tocante e evento, mientras por a haya kroket y softdrinks bou di un di e hutnan.

Contenido di acuerdo

Sra. Wever Croes, encarga cu e tarea di formacion, a hiba palabra bou un hut rondona cu prensa y publico presente. Sra. Wever Croes a subraya cu institutonan fuerte lo duna fruta na transparencia. Finansas publico tambe ta un prioridad pa e formacion di gobierno entre e 3 partidonan, pasobra ‘si bo no pone orden den situacion financiero, bo no tin fondo pa bo por cumpli cu bo pueblo’.

Segun sra. formador, lo pone atencion tambe na aspectonan humano cu segun su persona a wordo laga na caya e ultimo añanan. Entre otro lo percura pa mas siguridad pa asina tur persona por biba trankil, duna mas atencion pa problemanan social cu nos comunidad ta enfrenta y bienestar economico cu por trece ‘mas cupo di empleo na Aruba’. Desaroyo sostenibel tambe lo ta un punto di enfoke, hunto cu proteccion di naturalesa y mas inversion den enseñansa di calidad.

Esaki ta un pida chikito di loke ta bay pone atencion na dje den e proximo gobernacion, segun sra. Wever-Croes. Aparte di esaki, areanan manera integracion, relacionnan di Reino, cultura, sector primario y energia sostenibel.

Compaña pa aplauso di publico presente, e tres lidernan di partido Otmar Oduber, Ricardo Croes y sra. Wever-Croes mes a firma y parafeer e acuerdo aki, cual nan a expresa di ta ‘un union simbolico di tur tres colonan di e partidonan cu lo bini hunto pa bienestar di Aruba’.

Stapnan pa yega na un coalicion

Manera ta conoci, riba 27 di oktober un parlamento nobo lo wordo institui oficialmente. Riba esaki sra. Wever Croes a comenta cu nan meta ta pa ‘ora drenta un parlamento nobo, pa tin un gobierno nobo tambe’. Pues el a clarifica cu nan ta on track pa haci esaki un realidad. Sinembargo ora prensa a puntra si a bin caba palabracion riba ki cartera lo pertenece na ki partido, sra. Wever-Croes a desmenti esaki.

Nos mester yega na un acuerdo di gobernacion formal prome cu nos por yega na reparti cartera. Awo nos a haci e prome stap y pone e prome piedra abou pa cuminsa e proceso aki”.

E proceso segun sra. Wever-Croes lo cana di manera cu esaki ta e prome stap, ora bin na acuerdo di gobernacion mes lo ta e di dos stap y e di tres stap lo ta reparticion di cartera. Pa yega na un decision ken lo bira cua minister, sra. Wever a splica cu e partidonan lo presenta candidatonan y despues di esaki lo haci nan proceso di screening.

Sinembargo segun sra. Wever-Croes e negociacionnan pa repartimento di cartera lo mester a tuma luga caba. Pues e ora ey cada partido lo presenta nan candidato ora e proceso ta asina leu. Una bes cu e screening ta cla, sra. Wever Croes a splica cu e parlamento nobo lo mester apunta y aproba e gabinete nobo.

Ceramento di Parkietenbos dump

Bon Dia a puntra sr. Oduber, lider di partido POR si lo cumpli cu promesa cu a wordo haci durante campaña pa cera parkietenbos durante un termino rasonabel si POR drenta gobernacion. Sr. Oduber a responde cu ta mucho tempran pa papia riba e contenido di kico e gobernacion nobo lo encera, mirando cu e plan di gobernacion no a wordo traha ainda. Nos lo keda riba e tema aki ora e proceso ta asina leu cu e partidonan lo mester a bin cu un palabracion riba e tema.

Despues di a contesta e pregunta sr. Oduber a splica cu e acuerdo di formacion cu e 3 partidonan a caba di firma lo ta e prome stap pa asina yega na un miho Aruba. Pues despues di esaki nos a puntra si e acuerdo lo wordo poni na disponibilidad di pueblo of prensa. Sra. Wever-Croes a splica cu e acuerdo lo wordo gescand y lo wordo manda pa nos por tira bista riba dje. Esaki en berdad a wordo manda pa nos redaccion y otro prensa.

Sr. Croes a comenta cu no mucho mester wordo bisa aparte di loke sra. Wever-Croes a bisa caba, solamente cu e luga Ayo Rock Formation a wordo scogi pa ‘asina refleha e fortalesa y e intencionnan cu ta wordo poni como fundeshi’. “E nomber di e luga aki tambe ta pa nos bisa Ayo na e 8 aña di mal gobernacion nos tras, pues danki pa bo confiansa. E coalicion aki lo ta solido”.

Momento historico: coalicion

Ophelia Beyde, kende a presenta pa e evento a conta Bon Dia dicon el a atende esaki. Sra. Beyde a splica cu como Arubiano e ta haya cu e momento aki ta uno historico pa Aruba, pasobra ‘a demonstra cu un gobierno totalitario tabata desastroso pa nos pais’.

E prome aña, tur gobierno ta traha bon. Ya pa e di dos aña tur ta traha na beneficio di nan saco y nan compinchi. Pues pueblo a fada y a bay urna pa trece un cambio, pues p’esey e coalicion cu ta bin awo”.

Sra. Beyde a expresa cu e ta haya e coalicion aki ta esun mas miho cu lo por tin. “No ta un secreto cuanto eror y blunder e ultimo gobierno a comete. Hopi cos nan a haci y lo nan sigui haci manera nada un pasa, manera laga nan coordinadonan riba payroll, pa wordo paga cu cen di pueblo. Awo nos ta cuminsa na cero despues di 16 aña sin un gobernacion di coalicion”.

Segun sra. Beyde e por sinti e bientonan di cambio den e coalicion aki, mirando cu MEP a haya hende nobo, Otmar tabatin añas den AVP pero tabata ‘e unico cu a traha’ y ‘bo tin Ricardo, cu ta manera e revolucionario cu no ta worry y ta bisa e cos cla y raspa manera e ta’.

Mi ta kere e coalicion aki lo por keda pa mas cu 4 aña y mi tin confiansa cu e tres partidonan aki lo traha na beneficio di Aruba. Te hasta si nan no logra esaki mi lo critica nan mescos cu e gobierno cu a sali, pasobra p’ami ta Aruba ta prome”.

You May Also Like

‘Sindicatonan mester cambia pa confronta crisis di falta di miembronan’

Sindicato como cualkier organisacion tin su crisisnan y retonan. Un di su crisis ta ...

‘Expedicion Arkeologico edicion Fin di Aña’

Museo Arqueologico Nacional Aruba (MANA), hunto cu Stichting Monumentenfonds, ta ofrece tur hende cu ...

11febNG SADA.jpg

Sindicato SADA a reuni cu Minister di Financia riba nan puntonan di preocupacion

Manera cu a keda anuncia desde siman pasa, sindicato SADA, a base di e ...

Gobierno kier bin cu un otro centro medico

Dos dokter extra pa alivia sala emergencia Minister di Salud Publico a anuncia cu ...

Xander Bogaerts

Beisbolista Xander Bogaerts ta skirbi historia

Beisbolista Xander Bogaerts ta e prome Arubano cu a drente e seleccion pa e ...

image.jpeg

A termina relacion di trabou cu Director di Colegio EPI

Minister di Enseñansa, Michelle Hooyboer-Winklaar a tuma e decision pa termina e relacion di ...