KvK lo busca contacto cu Formado pa bin cu mas reunion cu gremionan

Presidente di Camara di Comercio di Aruba (KvK), Ernst Mohamed a laga sa cu como gremio comercial nan ta siguiendo di cerca e proceso di formacion di gobierno nobo. Ya caba KvK a forma parti di e grupo di instancianan cu a bay cerca di gobernador durante e proceso inicial di informador.

Tambe nan lo kier pa Formado bin cu mas reunion cu instancianan manera Ahata, Atia, ATA y KvK pa asina e gremionan ta mas envolvi, ya cu nan ta dispuesto pa yuda. “Nos a yuda hopi e gobierno anterior”, el a bisa.

Sr. Mohamed a declara na Bon Dia Aruba cu KvK lo busca contacto cu Formador Evelyn Wever-Croes, ya cu ora cu nan a sinta cu gobernador di Aruba, el a pidi pa KvK traha nan vision. Ya caba nan a entrega nan plan na gabinete di gobernador. Awor nan ta spera cu e proceso di formacion di gobierno por sigui. El a indica cu ya caba KvK a duna tur nan proposicion caba y tambe nan a yega di sinta cu representantenan di partido MEP varios biaha. Tambe nan a yega di sinta cu POR varios biaha caba.

Segun presidente di KvK e reunionnan aki a bay den bon ambiente y nan tur tabata di acuerdo cu “tin cierto cambionan cu mester bini riba tereno di educacion pa asina duna sosten na e parti social. Igualmente pa percura cu e sector di comercio bira un mas un level playing field.

Pa KvK ta importante pa den e proximo gobierno e direccion di comercio ta one stop shopping. Tambe pa KvK por wordo envolvi mas. Pero pa yega na e nivel aki segun presidente di kvK mester cuminsa traha riba varios leynan. Pero mas importante ta cu gobierno mester ta disponibel pa bin cu e cambio riba leynan, pa asina KvK por haya mas autorisacionnan pa haci e proceso di haci negoshi na Aruba mas facil. Tambe e reglanan cu KvK ta bin cu ne a base di ley por wordo sigui debidamente. Tur esaki lo facilita tambe pa entrada lo por drenta den caha di gobierno via belasting.

Pa KvK ta importante pa bin cu zona of area pa strictamente e comerciantenan por pone nan negoshi. “Nos ta wak hopi diferente negoshi pa loco den tur areanan”, el a bisa. Nan ta haya cu e desaroyo aki no ta bon pa e mesun bario, ya cu e ta devalua e balor di bo cas. Un ehempel ta ora cu bo tin un garashi of otro sorto di negoshi banda di bo cas of bisindario. E zona di comercio mester tin su luganan, el a laga sa.

Reunion gremionan

Tur cos cu ta regarda pa promove comercio y tambe pa e generacion nobo di comerciantenan local bay dilanti, ta puntonan cu KvK ta haya relevante pa sinta na mesa, pero tambe trece cerca gobierno locual ta pasa den comunidad, ya cu tin biaha sector di nos comunidad no ta yega gobierno sino cu nan ta bay bati porta di KvK pa scucha nan. P’esey e ta haya importante cu KvK por haya un rol pa por guia. El a indica cu KvK no ta akinan pa impone, sino pa percura pa guia. “E gobierno tin e direccion cu e instancianan di comercio kier pa eynan nos por guia”, el a bisa.

Como bos di comercio, KvK ta haya cu economia y educacion ta aspectonan cu ta bay hunto mescos cu e parti social. Nan como gremio comercial por duna un guia riba e terenonan aki. “E parti social mester wordo atendi”, segun sr. Mohamed.