Koningin Wilhelmina Fonds (KWF) Aruba a bin cu un conferencia di prensa pa anuncia cu Setar a facilita nan plataforma y instrumento pa bo por haci bo contribucion boluntario di un forma facil y sigur.

Presidente di e fundacion aki, Lilly Prince a bisa cu a pesar di e pandemia, KWF a sigui yuda y asisti e pashentnan di cancer na Aruba. Sinembargo aña pasa nan no tabatin un oportunidad pa e fundacion por a colecta. Pero menos mal cu nan tabatin fondo cu a permiti cu durante 2020 nan por a cumpli cu e pashentnan cu tabata bati nan porta. Pero nan gastonan ta grandi.

Aña pasa nan gasto a surpasa e suma di 155 mil florin. Nan mester di sosten di comunidad pa sigui brinda ayudo na e pashentnan di cancer. P’esey directora di KWF a bisa cu e fundacion ta sinti su mes privilegia cu e compania di telecomunicacion Setar ta bay duna e fundacion un man.

Rayla Lopez di Setar a laga sa cu via e app:@pay.aw tur hende interesa por haci nan donacion digitalmente na KWF. Simplemente bo ta baha e app den bo cel y bo ta registra como un cliente nobo y bo ta link cu bo banco. E ta e forma cu bo por trece placa den e sistema aki pa asina haci bo donacion na KWF. Via e sistema aki bo por duna e donacion cu bo kier desea, y tambe cuanto biaha cu bo kier haci’e.

 

E aña aki nan mester core un campaña pa colecta fondo, y ya caba nan a haya un luz berde pa cuminsa e proceso di permiso pa subi caya. “Na april nos tin cu cuminsa, pasobra ora cu nos colecta nos tin e fondonan necesario pa sigui cu e yudansa den comunidad, manera mester ta,” presidente di KWF, Lillian Prince a bisa.

 

 

 

LEAVE A REPLY

Please enter your comment!
Please enter your name here