Siguiendo e resumennan diario di Departamento di Salubridad Publico DVG, a nota un tendencia e luna aki pa loke ta trata morto y hospitalisacion relaciona cu malesa di Covid-19. Particularmente, a tuma nota cu durante luna di februari, te awo, Aruba a conoce 12 fayecido pa Covid-19.

Segun datonan di DVG, dia 1 di februari a habri cu un total di 59 fayecido pa Covid-19. Dia 3 di februari a registra 2 fayecido, y un morto dia 4 di februari, pa loke tabatin 3 fayecido pa Covid-19 den e prome siman di februari.

E siguiente siman, dia 8 di februari a bolbe registra 2 morto mas, y dos dia 9 di februari, y otro dos dia 10 di februari. E ultimo tres caso di fayecimento pa coronavirus a keda registra dianan 16, 18 y 19 di februari, respectivamente. Asina ta registra 12 morto pa coronavirus den un solo luna na Aruba.

Ademas di esaki tambe por a nota un tendencia di aumento den casonan di hospitalisacion durante e luna aki. Mientras cu dia 1 di februari tabatin 19 persona interna den hospital pa tratamento, ayera ya esaki a aumenta na 27. Claro mester recorda cu e cantidad di hospitalisacion ta subi y baha cada dia dependiendo di cantidad di recuperacion y di admisionnan nobo. Sinembargo, den henter luna, e dianan cu a mira un mayor cantidad di persona ingresa den hospital pa coronavirus tabata ayera (27), diamars (23), y dialuna (20). Prome cu esey, den henter e luna e cantidad mas grandi (20) a keda registra otro dos biaha, dia 2 y 3 di februari. E cantidad mas abao di hospitalisacion tabata dia 18 di februari ultimo, cu tabatin 8 hospitalisacion.

Paisnan cu a cuminsa nan campaña di vacunacion prome cu Aruba, manera Reino Uni, a reporta un reduccion den cantidad di hospitalisacion pa Covid-19 desde comienso di e campaña. Por anticipa cu awo cu a inicia e vacunacion di nos poblacion, lo tin un reduccion den cantidad di hospitalisacion. Israel a reporta cu mas di 90% di fayecido pa Covid-19 na e pais tabata hende sin vacuna, sinembargo, no tin data determinante ainda relaciona cu vacunacion y morto pa e malesa.

LEAVE A REPLY

Please enter your comment!
Please enter your name here