American University School Medicine Aruba (AUSOMA) a duna un conferencia di prensa ayera mainta pa asina informa comunidad tocante un Memorandum of Understanding (MoU) cu nan a firma cu Hudson Valley Community College (HVCC) di Merca, den e cual hobennan di Aruba y di e region di Caribe lo wordo beneficia.

Esaki tin como obhetivo duna mas oportunidad na studiantenan pa loke ta trata educacion superior incluyendo un ruta directo na un programa MD pa studiantenan di HVCC.

Jawad Shaikh, presidente di directiva di AUSOMA, y el Dr. Roger Ramsammy, presidente di HVCC, a reuni cu prome minister Evelyn Wever-Croes y minister di Enseñansa Endy Croes pa asina ofrece un descripcion general di e programa academico, como tambe e beneficionan pa Aruba y region di Caribe.

Cu e asociacion aki, e dos universidad lo ofrece un programa di degree cu lo duna na studiantenan di MAVO, IPE, GED HAVO y esun cu a gradua na nivel secundario den e region di Caribe y di Aruba un titulo a traves di HVCC na AUSOMA na Aruba mes of di manera online.

Lo proporciona na studiantenan di e carera di medicina di AUSOMA un titulo asocia cu Ciencia Biologico, tambe lo ofrece na studiantenan un final exitoso di un programa Pre-Medical a traves di HVCC cu e opcion di drenta na e programa di AUSOMA PD.

Di mesun manera, studiantenan lo tin e posibilidad di completa nan estudio cu un titulo asocia cu e opcion di drenta na scolnan afilia na State University of New York (SUNY) di Merca a traves di politica di transferencia existente.

“E programa aki ta significa hopi pa brinda na studiantenan di Merca, Aruba y region di Caribe diferente opcion pa busca oportunidadnan di educacion superior acredita na Merca” Jawad Shaikh, presidente di directiva di AUSOMA a señala.

Di mesun manera el a splica cu nan ta emociona di duna e paso importante aki pa formalisa nan relacion y asina fortalece e relacionnan di cooperacion den areanan di enseñansa y otro actividadnan academico.

Den proximo simannan AUSOMA Y HVCC conhuntamente cu Gobierno di Aruba lo finalisa e logistica y detayenan adicional di e programa unda cu nan tin calcula di cuminsa cune na luna di september pa asina nan por prepara nan espacionan, segun loke nan a señala.

Di su parti, Kanaan Baroud director di operacion di AUSOMA a bisa cu aparte di Medicina e studiante por tuma e prome dos aña pa nan prepara nan mes den direccion di universidad y asina nan por scoge ki carera nan lo kier studia.

El a pone como por ehemplo, cu na Aruba actualmente tin aproximadamente 1.200 studiante cu ta tumando e programa di GED na International School cu ta wordo subsidia door di gobierno manera el a sigura, “ora nan caba gradua nan no tin caminda di bay pasobra Universidad di Aruba no ta tuma nan, e sistema no ta reconoce door di e sistema Hulandes y nos kier e opcion aki pa tur studiantenan, pa tur studiante cu ta studia GED por bin cerca nos y sigui, haya un diploma acredita Mericano na Aruba”, el a expresa.

Nan tin e opcion di keda nan Aruba pa traha y ora nan lo haya e prome parti cu ta e social degree nan ta sigui cu e parti na Merca cu ta dos aña mas unda nan lo haya nan bachelor degree.

Baroud a declara cu aworaki nan ta cuminsa cu dos aña y si tur cos lo bay bon probablemente nan lo por haci e bachelor degree tambe na Aruba.

Tambe el a bisa cu e paso aki a bin dilanti pa motibo di idioma unda esun mas facil pa muchanan siña for di chikito ta Ingles y ora nan ta bay scol pa papia Hulandes ta un problema debi cu ta un idioma mas dificil, aunke nan tambe ta reconoce y acepta cu Aruba ta un isla Hulandes cu ta cay bao Reino di Hulanda unda tin cu respeta esey y idioma Hulandes ta hopi importante unda cu tur ley na Aruba ta na idioma Hulandes.

Pa loke ta trata estudio riba su mes, Baroud a comenta cu Ingles ta hopi mas facil y nan kier tin e opcion aki pa studiantenan cu ta tumando e programa GED y pa MAVO tambe y IPE pa nan keda studia na Aruba y no bay pafo cu tin un costo halto.

Hudson Valley Community College a ser funda na 1953 y ta ofrece mas di 85 programa di grado y certificado na cuater scolnan como: Business; Engineering and Industrial Technologies; Health Science; Liberal Arts and Sciences; y un centro di oportunidadnan di enseñanza pa e formacion academico y profesional, e ta un di e 30 scol comunitario na e sistema di State University of New York, conoci como lider di iniciativa y aprendisahe na distancia y capacitacion laboral.

Igualmente, AUSOMA a ser crea na 2011 y for di 2018 a cuminsa cu e instruccion cu educacion accesibel pa studiantenan internacional di Medicina, el a wordo reconoci pa Organisacion Mundial di Salud (OMS) Comision Educativo pa Graduadonan Medico Stranhero (ECFMG) y Gobierno di Aruba pa otorga titulo di medico y permiti pa nan practica na Merca, Canada of cualkier otro luga na mundo.

Pa personanan interesa haya mas informacion di e programanan y registracion, por bishita nan website www.ausoma.org